Atualità
Cursc y ejams de ladin per lauré te scolina y te scola
USP – Nteressei al lauré te scolina o te scola ladina muessa avëi fat l ejam de ladin per pudëi fé pert dla graduatories. Tl mëns de fauré vëniel pità cursc de preparazion per l ejam che sarà chëst ann ai 21 de merz.
La dumandes per fé l ejam dl 21 de merz muessa uni fates nchin al plu tert ai 19 de fauré pra la Ntendënza ladina a Bulsan. L ejam vën damandà te na pert scrita y a usc. Tla pert scrita iel da fé na traduzion dal talian o dal tudësch, aldò dla ulentà di candidac. A chiche passa chësc ejam per pudëi fé pert dla graduatories, ti vëniel nce recunesciù l ejam de ladin, de livel A, per l trilinguism.
I cursc de preparazion al ejam de ladin per lauré te scolina y te scola ladina scumëncia per l badiot ai prim de fauré. L Istitut Ladin Micurà de Rü pieta chisc cursc ta cin sentedes che vën tenides per badiot tla sënta a San Martin. L curs tenì da Giovanni Mischì sarà ai prim, ai 8, 15, 22 de fauré y pona mo ai prim de merz dala cater nchin la sies domesdì.
I cursc de gherdëina per anjenië l ejam scumëncia ai 9 de fauré y jirà inant ai 10, 16, 17 y 21 de fauré, for dala cater nchin la sies domesdì tla sënta dl Istitut ladin te Sëlva. Referënt de chësc curs de preparazion ie Marco Forni.
Nfurmazions nplù per i cursc de preparazion possen damandé diretamënter tl Istitut Micurà de Rü (tel. 0474 523310 o 0471 794268).
Tla direzions dla scolines, dla scoles y tla Ntendënza Ladina giaten nce l liber “Cultura ladina” per se anjenië al ejam.
as
