Atualità
Jonta provinziela: miuré i culegamënc per fonins y internet
USP – La situazion atuela n cont de culegamënc per i fonins y l’internet ie ncuei (07 fauré) stata un di argumënc zentrei dla senteda dla Jonta provinziela. A una de ulëi ruvé plu riesc a n miuramënt di culegamënc tla valedes da na pert ora, se damanderan n’ancunteda cun l aministradëur dla Telecom Franco Barnabé.
Te truep mëndri luesc, dantaldut te raions n pue’ desman, ne cuer la rë di fonins nia dut l raion. Per abiné su linea dl fonin muessen jì a se crì la drëta luegia y sce n ie sun l viac, toma l culegamënt plu suvënz. “Chësta situazion ne cumporta nia plu cualità de vita” à dit l presidënt Durnwalder tla cunferënza stampa do la senteda dla Jonta. Per ruvé plu riesc a n miuramënt à la Jonta dat pro de damandé n’ancunteda cun l aministradëur dla Telecom Franco Barnabé. “O che giapon i servijes che adurvon, o che messon crì alternatives” à dit l presidënt.
L culegamënt aslune de internet ie te nosc tëmps deventà no me de mpurtanza primara per l’economia, ma l cumporta dantaldut per luesc plu desman, n servisc per miuré la cualità de vita. Per la gran firmes de telecomunicazion ne ie i raions da mont cun manco populazion nia nteressanc assé per fé de majeri nvestimënc. La Provinzia de Bulsan che se à sëurantëut chësta problematica à bele purtà inant dassënn l servisc. La Jonta provinziela ie stata a una de ntensifiché i programs che à l travert arjonjer nchin dl 2013 duc i chemuns. Proscimamënter uniral metù roles nueves dal strom sota tiera, te chësta ucajion ulëssen nce meter ju la roles per i cabli de fibra otica. “A chësta maniera sparanions tëmp y custimënt” à dit Durnwalder. Te de plu caji à la Provinzia bele anjenià la roles, ma la firmes privates ne à mo nia tacà ite l internet.
Da Mals, nchin Maran, Bulsan, Persenon y nchin ala sëida do Innichen/San Ciana iel bele unì metù l culegamënt de fibra otica. Da na pert ora à la prima valedes, sciche Sarentin o Taufes bele giapà l culegamënt nuef. Danter Furtëza y l Prëner iesen tl lëur de fé i culegamënc de internet aslune. Dut l raion provinziel ie curì cun la linea aslune, ma te de plu valedes da na pert ora mancel mo l culegamënc cun cabl.
as
