Atualità
Tosc i prim ejams de rujeneda per zitadins nia comuniteres
USP – Cun 110 iscrizions al ejam de rujeneda per zitadins nia comuniteres à la Jonta provinziela (ncuei) ai 7 de fauré fat ora de purté inant la preparazion a na maniera che i ejams possa prësc scumencé. Purempò fajeran l puscibl acioche vënie nce azetà l ejam per la rujeneda tudëscia.
Aldò dl decret dl Minister dl ntern, dat ora de juni 2010 adrova i zitadins nia comuniteres n ejam de rujeneda per pudëi sté plu giut tla Talia. L’ejam muessa unì dat ju nchin a doi ani do che i ie ruvei tla Talia, cun la puscibltà de pudëi spënjer de n ann sëuraprò. “Tla provinzia de Bulsan se à 110 bele lascià nuté su per l ejam, śën iel debujën de purté inant l’urganisazion per ne danejé deguni” à dit l presidënt dla provinzia tla cunferënza stampa do la senteda dla Jonta.
Da pert dla Provinzia de Bulsan ulëssen pité n alternativa nce l’ejam per tudësch, cossa che fossa dessegur de nteres per la jënt che vif ti raions ora de zità. Chësc ne ie te chësc mumënt mo nia azetà a Roma. Purempò se mpënia la Jonta provinziela per purté inant chësta puscibltà. Ntan uelen scumencé cun i ejams per talian l plu riesc puscibl.
as
