Atualità
La stazion de Pruca for plu mpurtanta per l trasport publich
USP – I lëures che unirà fai chëst ann per cumedé ca la stazion de Pruca ie unic prejentei dala assessëur Thomas Widmann ai ambolc y reprejentanc di chemuns ujins. Te chësta ucajion iel nce unì analisà i culegamënc dla curieres cun la valedes ntëurvia.
La mira dl’ancunteda danter l assessëur Widmann y i ambolc ie stata de ti cialé deberieda ala situazion di lëures n cont de mubilità y n cajo de pudëi mo fé miuramënc. Nsci iela nce stata n mierculdi ai 9 de fauré canche l ie ruvei adum i reprejentanc di chemuns de Pruca, Laion, i trëi chemuns de Gherdëina, Ciastel, Barbian y Villanders.
“Ti ultim ani ie i culegamënc cun ferata y curiera unic ntensifichei dassënn. Da Gherdëina iel da jené 2008 uni mes’ ëura na curiera che porta nchin a Pruca per tò da iló la ferata che va a Bulsan. A chësta maniera ie la stazion de Pruca deventeda n pont zentrel per l trasport publich. Śën vala de limé ti culegamënc y de miuré l servisc aldò di bujëns” à dit Widmann.
La stazion de Pruca ie una dla pueces che ne ie mo nia defin passedes ala Provinzia. I lëures per la cumedé ca ie bele n pert unic fai. Nchin de dezëmber 2010 iel unì finà la plazes dai auti, l salejà y la stazion dala curieres. L ie nce unì anjenià n sistem de urientamënt per vierces y parëies de lën per chëi che aspieta la ferata dlongia la scines.
D’ansciuda uniral laurà inant per pudëi finé l ressanamënt nchin d’instà 2011. L ie udù dant de fé lueges da lascé la rodes a sosta, na ntreda cun sieves y parëies contra la fuera. Da nuef uniral nce fat la sala da aspité, l porc sota la scines y la ndicazions sun fonz.
Pra l’ancunteda cun i ambolc iel nce unì rujenà dla puecia lerch per lascé i auti. L ne ie nia drë mesun ngrandì la plazes, perchël iel aldò de Widmann danerauter unì analisà l servisc de trasport nchin ala stazion. Argumënt de descuscion ie nce stat la curiera Nightliner che da lugio 2010 furnea de sada da Pruca y Tluses de viers de Burnech. Chësc servisc ie mo te na fasa de sperimentazion y da n’analisa finela se aspieten soluzions de miuramënt.
as
