Atualità

Manfred Mölgg, 28 ani de Al Plan de Mareo à nuzà la bona cundizions dl purtoi tla prima mace y fova cun l numer un deventà segondo. La temperatures nia cis a inviern à sciaudà la nëif dl Gudiberg de Garmisch a na maniera che tla segonda mance ie me puec stai boni de mantenì si posizion. Manfred Mölgg à me messù zeder l post a Jeans Byggmark (segondo) y al franzëus Jan Paptiste Grange che ie deventà campion dl mond de slalom. "Mölgg à sapù da dé dut tla garejeda plu mpurtanta dla sajon, ne se à nia lascià pië dal emozion y se à davanià na bedaia plu che meriteda", nsci la prima reazion dl presidënt Durnwalder che ie nce assessëur provinziel al sport. I auguresc da pert dal Jonta provinziela vën nce sorissei dal assessëur provinziel Florian Mussner unerà dal suzes dl atlet ladin.

Manfred Mölgg ova dan doi ani venciù n slalom sun l purtoi de Garmisch y ova tlo festejà si segonda vënta te Copa dl Mond. Dan cater ani fova l atlet ladin deventà vizecampion dl mond de slalom pra i campionac dl mont de Are tl Sweden. Chësta de Garmisch, ie bele si segonda bedaia mundiela.

Cun l slalom ie finei via campionac storics per la provinzia de Bulsan. Christof Innerhofer de Gais à cun or (SuperG), bront (libra) y arjënt (cumbinazion) venciù trëi bedaies. Peter Fill de Ciastel à venciù l bront tla cumbinazion. Deberieda cun Mölgg, à i altec dl Südtirol venciù 5 dla sies bedaies talianes. De plu bedaies à me l'Austria che ie unida reprejenteda 8 iedesc sun l podium. "Cin' bedaies pra i campionac dl mond testemunieia nce l bon lëur che ie unì fat y che vën mo for fat te nosta provinzia tl ciamp di jëuni" à dit Durnwalder. Trueps ie nce stai i zitadins che se à lascià apasciuné dala garejedes a Garmisch y do doi enes de festa dl schi rejona l presidënt dla provinzia nce de na sburdla de popularità per l sport dl schi che à purtà truep turism y bënsté te nosta valedes.