Atualità
Jonta: degun mulins dal vënt sun la Montes dl Südtirol
USP – La Jonta provinziela ne uel nia lascé pro che l vënie fat mulins dal vënt sun la montes dl Südtirol. L presidënt Durnwalder à (ncuei) ai 21 de fauré cunedì la dezijion de mascima cun ezezion per l proiet sun i ëures sëura l Prëner.
Tla descuscion sun i mulins dal vënt per fé strom vëniel valutà pertes positives n cont de na produzion de energia nëta, segura y che vën for do permez ala pertes negatives n cont dl cialé ora dla cuntreda y l bujën de fé stredes nueves da mont su. I assessëures à da si pert dat na resposta a chësc argumënt se detlaran contra i mulins dal vënt.
Sun la produzion de energia nëta ie truepa jënt de prinzip a una ma pona tl cuncret vëniel metù truepa cundizions. “On nce giapà truepa dumandes per fé mulins dal vënt te Puster, val de Isarch y val Venuesta, sën ons dat na resposta” à detlarà l presidënt dla provinzia te cunferënza stampa. L proiet di mulins sun l Sattelberg dl Prëner cumporta na ezezion da chësta posizion de mascima dla Jonta. “Chësc ie n proiet ulache i mplanc ie do la rata duc adum y mplù iel bele la vedla streda di saudeies” à argumentà Durnwalder. Sce l proiet dl Prëner giapa duc i bënsteies dla cumiscions, puderal nce unì realisà.
Tl cajo de Mals ne lascia la Jonta provinziela nia fé mulins sëuraprò. Chëi doi che ie bele sun la Malser Haide possa mo unì tenì cin ani per se paië ju l custimënt y pona muessi unì tëuc demez.
Durnwalder à nce nunzià l proiet generel dl "Green Corridor" che vëija dant de plu pruvedimënc a bën dl ambient tla valeda dl Isarch. La se trata tlo dantaldut de spusté l trasport dala streda ala ferata y sustenì formes de energia che respetea l ambient.
as
