Atualità
Ancunteda per miuré ferata y la stazions
USP – L’ancunteda dl presidënt Durnwalder cun l diretëur generel dla ferata statela, stata n vënderdi, ie nce (ncuei) lunesc, 21 de fauré stata argumënt dla senteda dla Jonta provinziela. L bujën de cumedé ca de plu stazions y pusciblteies de sëurandé la cunzescion per la trata da Bulsan y Maran ie unì azetà da tramedoi pertes.
L ruvé a una cun l diretëur la ferata statela Mauro Moretti uel di pruspetives per ressolver truepa cuestions sciche l culegamënt cun Dispruch, l finanziamënt da pert dl’autostreda y l cumedé ca de plu stazions dla ferata. Per la stazion de Burnech iel udù dant n custimënt de 19 milion de euro che dëssa unì finanzià mez y mez danter Provinzia y ferata statela. Sce la pert dla ferata vën paieda cun scioldi o cun puscions, iel mo da udëi. Chi che fajerà i lëures pra la stazion a Persenon ie ënghe mo da udëi. La Provinzia fossa a una de fé i lëures sce la giata lessù la puscions da fé plazes dai auti che pudëssa, aldò de Durnwalder, nce unì nuzedes per n culegamënt cun la Plose.
Tl’ancunteda cun Moretti iel nce unì rujenà dla cunzescion dla scines danter Bulsan y Maran. La ferata statela fossa a una de dé inant chësta cunzescion ala Provinzia. Perchël uniral metù man tratatives cun l Minister che dà ora la cunzescion. Da pert dl presidënt dla provinzia iel nce unì purtà dant l bujën de fé di stazions nueves: una a Sinich y una a Kaiserau/Casanova de Bulsan.
as
