Atualità
Scumecià l’ativazion dla cherta di servijes
USP – Chisc dis vëniel spartì ora l’ultima pert dla 400.000 chertes saniteres nueves che cun n microchip puderà unì nuzedes per na lingia de servijes dl’aministrazion publica. La cherta sanitera – cherta provinziela di servijes, puderà da (ncuei) ai 7 de merz unì metuda n drova pra la purtines anjeniedes ite aposta.
Gran pert di zitadins à bele giapà la nueva cherta sanitera – cherta provinziela di servijes y prësc puderai mparé a cunëscer si vantajes y pusciblteies. La cherta nueva pudëssa te n prim mumënt semië me na atualisazion dla vedla cherta, ma per drët iel scialdi de plu. Tres n’acurdanza cun l’Agenzia dla ntredes vel la cherta di servijes sciche documënt per l còdesc fischel y per pudëi se nuzé dla prestazions saniteres tla Talia y oradecà, ma la nuvità ie mo n’autra. “la cherta dei servijes, spiega l assessëur Roberto Bizzo, ie sciche na tlé eletronica-digitela per avëi n cuntat plu strënt cun l’aministrazion publica. Tres l microchip che ie tla cherta possen ruvé permez a na lingia de servijes publics tres l computer persunel, te na maniera segura. A chësta maniera se sparanien de jì ncantëur ti ufizies y nce truep tëmp.
Dal 7 de merz (ncuei) possa i singuli zitadins fé l’ativazion dla cherta di servijes. Te duc i chemuns giata uni familia n pitl aparat per liejer la cherta, che n possa taché ite al computer. I servijes che n possa se nuzé tres la cherta nueva ie nunziei sun la plata web www.provincia.bz.it/cartaservizi ulache n possa pona nce fé l’ativazion dla cherta.
Per pudëi pona veramënter se nuzé di servijes, muessen aspité vel di che n giapa mandà a cësa l còdesc PIN che ie debujen per pudëi fé la oprazions.
Ti proscimi mënsc uniral mo juntà servijes chemunei y servijes persunei tres la plates internet provinzieles. La lista di servijes che n possa se nuzé tres la cheta unirà man man atualiseda sun la plates web www.provincia.bz.it/cartaservizi
as
