Atualità
Valorisé i zëntri di luesc: sustëni nuef per cuatieres
USP – N sustëni nuef per cuatieres dëssa judé pro che la jënt reste ti zëntri di luesc mpede frabiché te raions nueves. La Jonta provinziela à (ncuei) ai 14 de merz dat pro n sustëni per cumpré n vedl cuatier, n pue’ sciche l sustëni che fova bele per frabiché y per la nfrastrutures primeres.
Per frabiché alesirà à la Provinzia udù dant n sustëni dl 50% a cumpré l gunt y de 50% per la nfrastrutures primeres. “Per n cuatier bele adurvà ne fovel nchinamo degun sustëni y nsci iel plutosc unì frabicà da nuef” nsci à l presidënt Durnwalder spiegà la situazion dl frabiché fajan referimënt ala cunseguënzes n cont de manco jënt ti zëntri, cuatieres uec, crëscer di luesc ntëurora y adurvé su la puscions.
Tulan ca Bulsan, Schluderns y S. Laurënz sciche ejëmpli, à l’Aministrazion provinziela analisà coche possa tenì su chësta tendënza. Nsci ie unida su l’idea de n sustëni nuef per cumpré o cumedé ca de vedli cuatieres ti zëntri. L sustëni provinziel ruva nchin a 50% dl valor dla cubatura, per n cuatier da 100 metri cuadrac, fossel nsci nchin a 49.000 euro. “Praedlan cun la situazion a Schluderns, paia la Provinzia mez l grunt y mez l custimënt de nfrastrutures che fajëssa ora 21.000 euro” à spiegà l presidënt. Paredlan cun i priejes plu auc te zità, ie l sustëni per vedli cuatieres ti luesc, relativamënter majer permez ala zità.
Cunscideran l majer sustëni che ruva mo leprò al sustëni che fova bele per cumpré o ressané n cuatier – sce l patron tën ite la cundizions – vëniel a chësta maniera nvià a se nuzé de vedla cëses mpede nen frabiché de nueves.
as
