Atualità
Jonta provinziela tën sun l’energia alternativa – geotermia mo da studië
USP – Tenian cont dla catastrofa nucleera tl Japan y si cunseguenzes à la Jonta provinziela mantenì si posizion n cont dl’energia alternativa y uel jì inant cun i programs bele nviei via. Danter la formes plu cunesciudes, an tl Südtirol mo puecia cunescënzes cun la geotermia. Sce chësta funtana de energia se adateda te nosc raion dëssa unì analisà te n studi.
Energia dl surëdl, la forza dl’ega, idrogenn, biomassa o mplanc cun pumpes. Chësta ie la formes de energia alternativa che l’Aministrazion provinziela uel nce sustenì tl daunì. “La desgrazies tl Japan nes da rejon a jì chësta streda” à dit Durnwalder do la senteda dla Jonta. Iust chësta desgrazia à fat muever na gran descuscion a livel mundiel n cont di periculi dl’energia nucleera, nsci à la Jonta provinziela detlarà te tenì dala sia y de jì inant sun la streda dl’energia nëta.
Na vijion mo nia drë tlera ne iel al mumënt sun la geotermia. Tlo na san mo nia sce chësta forma se adatea al raion da mont dl Südtirol. Per stlarì chësta cuestion à la Jonta provinziela nciarià la repartizion per tueda y inuvazion de studië plu da daujin chësta custion a na maniera da pudëi capì sce la geotermia possa unì nuzeda tl Südtirol te na maniera efizienta dal pont de ududa ambientel y economich.
as
