Atualità
Plu paiamënt ai nsenianc, ma manco lëures ora d’ëura
USP – La Jonta provinziela à azetà de recunëscer i ‘scatti’ che ie madurì l ann passa, a cundizion che l vënie fat manco lëures ora d’ëura. Tla provinzia de Bulsan vën i nsenianc de scola paiei ora aldò dla tarifa naziunela de basa y aldò dla njontes provinzieles.
Per i ani 2010, 2011 y 2012 ne dëssel aldò de Roma nia unì auzà i paiamënc di nsenianc. I nsenianc tla provinzia de Bulsan ie dependënc statei nce sce i vën paiei da Bulsan. N cont di paiamënc de basa vëija l Stat mpomo dant de recunëscer i ‘scatti’ che ie madurì danter mei y dezëmber 2010. Dal’autra pert vëniel da Roma nce damandà de smendrì la cumpëida de stieres y de sparanië cun lëures ora d’ëura. “Sce i nsenianc uel una pert, muessi nce azeté l’autra” à dit l presidënt Durnwalder (NCUEI) ai 28 de merz do la senteda dla Jonta provinziela.
Nscì iel unì dat pro de azeté i ‘scatti’ de paiamënt che fej ora de ndut 539.000 euro. Chësc vën cunzedù a cundizion che l vënie smendrì lëures ora d’ëura y nce i programs d’instà per sustëni a chëi che possa d’autonn fé do i ejams. “L aumënt de paiamënt y la reduzion de lëures sëuraprò, muessa per la casses provinzieles jì a ega” à dit l presidënt dla provinzia te cunferënza stampa.
as
