Atualità
10 milion de euro per 25 dla vedla uties dl CAI
USP – Feter 10 milion de euro spenderà la Provinzia ntan i proscimi ani tla 25 uties da mont che ie unides sëurantëutes dala Lia da Mont taliana CAI. Trëi uties muessa unì fates defin da nuef.
16 uties sun 25 ie aldò dla relazion dl assessëur Florian Mussner te de bona cundizions y sies te cundizions mesanes. „Per respeté l standard che ie debujën, iel ti proscimi ani debujën de cumedures per 1,7 milion de euro” à di l presidënt dla provinzia Luis Durnwalder do la senteda dla Jonta. Pra trëi dla vedla uties dl CAI ne se paiel nia plu a fé cumedures, chëstes muessa unì fates da nuef.
I proscimi vares ie śën de lauré ora na lista de prioriteies per valuté ciun lëures che ie plu de prëscia. Tl medemo tëmp uniral nce tratà cun l CAI per chëla strutures che ie unides fates dlongia la uties y che ne ie śën nia sun puscion provinziela.
De ndut fej la Jonta provinziela cont cun nvestizions per feter diesc milion de euro per cuncé ca la uties da mont. “N nvestimënt de gran valor nce per l turism alpin” à sorissà l presidënt dla provinzia.
Da cajo a cajo uniral nce valutà sce la uties da mont porta mo si servisc uriginel, o sce n pudëssa nce vënder o zaré jù vel una.
as
