Atualità
8,2 miliuns de euro por fires otiches – de gragn investimënc tla Val Badia
USP – Fora por les valades prinzipales dl Südtirol él bele gnü metü les fires otiches por l’internet asvelt; cina dl 2013 désseres avëi arjunt düc i comuns a na moda che la comunicaziun digitala arjunjes n livel alt te döta la provinzia. En lönesc, ai 28 de merz (inier) à la Junta provinziala aprovè le program anual por les infrastrotöres dl internet a banda leria presentè dal assessur Florian Mussner. A chësta manira él gnü garantì investimënc por 8,3 miliuns de euro. Feter n terzo de chësta soma vëgn spenü ite por la Val Badia.
“I investimënć tl coliamënt internet asvelt é important a livel strategich, ajache sce al ne n’é nia de bugn coliamënć ai mesi de comunicaziun digitai, resta i pici paîsc chić y ai se stënta da se svilupé inant” insciö l’assessur Mussner plëgn de sodesfaziun por l’aprovaziun dla Junta provinziala. “Cun chisc 8,2 miliuns de euro podunse fà n gran vare inant por colié düć i comuns ala rëi de fira otica”, dij l’assessur. I coliamënć de fira otica ne n’à nia ma la miù capazité, mo ai é inće i plü sigüsc danter les poscibilitês de banda leria.
En chësc ann gnaràl laurè pro 45 tòć, cun n valgügn laûrs metaràn impormò man, cun d’atri jaràn inant y n valgügn laûrs gnarà portà a fin.
I laûrs che vëgn fać tles valades ladines tol ite na gran pert dl program. Cun le coliamënt danter San Laorënz y Longega, y spo da dailò inant ćina a Al Plan y a La Ila, saràl meso da miorè dassënn i coliamënć cun i paîsc. “Por portè l’internet asvelt inće tres cabl ti paîsc dla Val Badia unse en chësc ann odü danfora feter 2,4 miliuns de euro” spliga l’assessur Mussner. Sön le program di laûrs él inće i coliamënć da Picolin a San Martin de Tor y da La Ila a San Ćiascian.
Cun i passa ot miliuns de euro gnaràl en chësc ann portè inant 45 proieć te döt le Südtirol. “Tl 2012 y tl 2013 gnaràl ćiamò spenü sis miliuns de euro al ann” spliga l’assessur por les infrastrotöres. Cun le coliamënt di comuns ala rëi de fira otica arjigna la Provinzia les condiziuns acioche les ćiases y les firmes pois ciafè le internet asvelt tres cabl. “An mëss inće dì che i podun ma fà i coliamënć ćina al punt de incrujada di paîsc, la lege ne se lascia nia rové pormez ales singoles ćiases, chësc po ma les impreses de telecomunicaziun fà” spliga l’assessur. Dl’ ultima pert di coliamënć vëgnel bele baié, “les tratatives é bele a bun punt” dij Mussner.
as
