Atualità
Dala Romania ala Ladinia per na miëur ntegrazion europea
USP – Reprejentanc dl servisc de ntegrazion dla scoles ladines lëura ativamënter te na grupa nternaziunela de metodologies dl mparé y per sustenì la ntegrazion tl’Europa. Tla Romania iel da permò uni tenì n’ancunteda sun cunzec de sustëni per mprenditëures jëuni che uel meter su firmes nueves y nsci dé da lëur a jënt. La proscima ancunteda sarà tl Südtirol per mparé a cunëscer proiec de ntegrazion tla scoles ladines.
La cin nazions Deutschland, Austria, Romania, Ungaria y la Talia ie reprejentedes te na grupa de lëur per se baraté ora esperienzes sun metodologies dl mparé. Ala fin de merz ie nce reprejentanc dl servisc de ntegrazion dla scoles ladines stai tla Romania per fé pea n’ancunteda sun cunzec per svilupé l spirt mprenditëur danter jëuni. Carla Comploj, Irene Costa y Alexander Prinoth ie stai danter i 18 partezipanc a chësta ancunteda ulache la se tratova de giamië esperienzes de utl per i cunzec economics a bën dla mendranza ungareja tla Romania. “Per rafurzé chësta mendranza y per sustenì na miëur ntegrazion tl’Europa iel unì tratà co mutivé jëuni a mëter su firmes che debe nce da lëur a d’autri” conta i reprejentanc ladins.
L prinzip dla grupa nternaziunela ie de arjonjer na miëur ntegrazion europea svilupan cunzec cun l sustëni dl’esperienzes baratedes ora. La proscima ancunteda sarà tl Südtirol per mparé a cunëscer co che tla scoles ladines vëniel sustenì la ntegrazions de sculeies. A mez auril uniral n iede tenì n’ancunteda a Sarns per vijité pona la scoles ladines ulache chësc aspet dla educazion y furmazion ie unì svilupà arjunjan de bon risultac. Ntan chisc dis uniral dantaldut prejentà l proiet “Se n sté bën a scola” che trata dl cumpetënzes sozieles y emoziuneles, cumpetënzes de comunicazion, tla cheder dla promozion de de plu rujenedes y dla cunescënza de plu cultures.
as
