Atualità
La Jonta provinziela uel svilupé l sustëni per cuatieres
USP – L sustëni ai zitadins per n cuatier ie stat un di gran argumënc tratei dala Jonta provinziela ntan si tlausura ai 21 y 22 de auril. I ponc zentrei ie stai la formes de sparanië per pudëi frabiché, la cundizions do avëi giapà cuntribuc provinziei y l pest de cubatura.
La Jonta provinziela ie tl lëur de valuté pusciblteies per nvië via nce da nëus formes dl sparanië per frabiche. “Tl’Austria y tl Deutschland vën chësta formes de sparanië sustenides cun chëutes lascedes do, cossa che ne ie nia ududa dant tla Talia” à dit l presidënt Durnwalder do la tlausura. Nsci vëniel valutà pusciblteies de judé tres cuntribuc o smëndri la njonta dla chëuta sun l davani IRPEF a na maniera da sustenì i jëuni a se mëter da na pert scioldi per frabiché.
La defrënzes de cundizions danter l frabiché alesirà y cuatieres cunvenzionei dëssa unì valivedes ora. Per l frabiché alesirà juda la Provinzia paian mez l priesc dl grunt, mez l priesc dla nfrastrutures primeres y cun cuntribuc per l frabiché nstës. Ma do 20 ani possa chisc cuatieres nce unì vendui. Autramënter iela per n cuatier che muessa unì cunvenzionà. N tel cuatier possa nce unì vendù riesc, ma l possa per for me unì nuzà da jënt che à la residënza o la stiera tl Südtirol. Per tò demez chësta defrënza, nsci l presidënt dla Provinzia, ulëssen fé a na maniera che l cuatier frabicà cun l sustëni alesirà possa do 20 ani unì vendù sce l vën cunvenzionà.
“Chiche giapa n cuntribut provinziel per n cuatier nia cunvenzionà, sarà tacà per vint ani” à dit Durnwalder.
Pra l frabiché cëses nueves se muda l pest de cubatura. Cuatieres che vën fai do l 13 de juni possa me adurvé tan de energia sciche udù dant dala categuria “cësa tlima B”. Nchinamo fova chësta sëida plu bassa y la “cësa tlima B” univa premieda cun n pest de 5% de cubatura. Te chël mumënt che l livel “B” ie de ublianza per duc, vëniel me plu dat n bonus per chiche frabica do i criteries “cësa tlima A”.
as
