Atualità
Reperc dl fascism: ai 2 de mei la prima tofles
USP – N lunesc ai 2 de mei uniral metù tu su la tofles de spiegazion pra i ossares de Mals y Gossensaß. A chësta maniera vëniel realisà la soluzion per contestualisé doi reperc dl fascism, che univa udui de pericul per l cunviver dla grupes etniches.
La tofles che spiega chi y ciuldì che al 1937 al 1939 fovel unì metù i morc de viera ti ossares ie anjeniedes y possa unì metudes su. Chësc vel per Mals y Gossensaß ulache chësta frabiches ie sun puscion provinziela. Autramënter iela a Innichen/San Ciana ulache l ossar ie sun puscion demaniale de ram militer. Perchël muessel mo unì metù a post la cuestion de dërt per pudëi mëter su la tofles.
Prupostes per l relief a Bulsan
Acioche l relief de Mussolini sun l palaz dla finanzes a Bulsan ne sibe nia na pruvocazion al cunviver dla grupes etniches ova la Jonta provinziela damandà prupostes per l curì ju, a na maniera che n ti ruve mpomo permez per ti cialé. L ie unì mandà ite 486 prupostes y chëstes sarà da udëi publicamënter riesc do Pasca. Merdi y mierculdi ai 26 y 27 de auril possen dala 10 ala 17 jì a ti cialé l palaz Widmann bas ite.
La cumiscion paritetica à bele cris ora cin prupostes. L presidënt dla Provinzia à dit che n ne ie nia sfurzei a lascé realisé una de chëla cin ideies y che n pudëssa nce cri ora na cumbinazion de plu prupostes. La Jonta provinziela traterà tosc inò chësc argumënt per arjonjer prësc na soluzion.
as
