Atualità
Miuramënc per internet slune y telefonia
USP – Sun 95% dl raion provinziel ie bele mesun giapé l internet debota, purempò uel la Jonta provinziela mo miuré la cualità. Per ruvé tan inant vëniel metù cabli de fibres otiches, tratà i operadëures dla telefonia y miurà la rë de antënes. Tla tlausura dla Jonta provinziela iel unì tratà programs de miuramënc.
I prim vares mpurtanc à la Jonta provinziela bele fat. Anjenian i culegamënc de banda lergia ne giaten l culegamënt slune nia me tla ziteies ma nce tla valedes. Davia che l Südtirol ie n raion da mont ne iel nce nia mesun ruvé dlonch cun la miëura cualità di servijes y nsci an messù mëter a jì na soluzion transitoria cun culegamënc via radio o satelit.
Per pudëi pité la miëura soluzions da pont de ududa tecnich lëuren tla Provinzia dassënn per ngrandì la rë de culegamënc cun fibres otiches. L assessëur Florian Mussner à pra la tlausura dla Jonta provinziela prejentà i programs per arjonjer nchin dl 2013 duc i chemuns cun la fibres otiches.
Tratatives cun la sozietà Telecom à purtà che l ie unì garantì de taché ite la roles provinzieles cun i zëntri de telefonia ti luesc. “Nchinamo ons abù dificulteies a taché ite i cabli pra i zëntri de spartizion, ma da pert dla Telecom nes iel unì segurà che chësc unirà ressolt ti proscimi doi mënsc” à dit Durnwalder, cumpanià dai vizepresidënc Berger y Tommasini te cunferënza stampa.
Tla tlausura iel nce unì tratà miuramënc per i culegamënc dal strom. N cont dla rë per fonins dëssel mo unì miurà la rë de antënes per curì miec dut l raion y zënza lascé bujes.
as
