Atualità
Jonta a una sun la pruposta dla purtina sëula
USP – Pudëi fé de plu documënc pra na purtina sëula, zënza messëi purté i documënc da un n ufize al auter. Chësc ie chël che la Jonta provinziela uel pité per de ju dumandes. La pruposta de lege reverda l manejé ntern de pratiches y de les dé inant danter Provinzia, Camera de Cumerz y chemuns.
Per purté na pratica burocratica a bon fin muessen suvënz jì dala Provinzia ala Camera de Cumerz y te chemun. Nchinamò fovela nscila che n l fova nce debujën de jì plu iedesc te de plu ufizies. Tl daunì uniral scemplificà chësta pruzedura per l zitadin, ti pitan na sëula purtina. L’idea de chësc servisc vën dala scumenciadiva “Impresa in un giorno”. “A livel naziunel iel unì sëurandat la cumpetënza de chësc servisc ai chemuns y n segonda linea ala Camera dl cumerz. Tl Südtirol ulons la mëter a jì ta na culaburazion dla trëi istituzions tulan ite nce la Provinzia” à dit Durnwalder.
Do che chësc servisc fova bele unì tratà l’ena passeda deberieda cun l cunsëi di chemuns, vala śën mo de udëi i servijes che unirà nce pitei tla purtina sëula. Chësc unirà proscimamënter fat ora cun na delibra dla Jonta provinziela a pert.
as
