Atualità
Seminar OSCE sun la mendranzes ai 20 de mei a Bulsan
USP – Reprejentanc de 56 nazions che fej pert dl’Organisazion per segurëza y culaburazion tl’Europa (OSZE/OSCE) vën ai 20 de mei aspitei a Bulsan per n seminar sun la posizion dla mendranzes n relazion ala pesc y segurëza. L seminar ie (NCUEI) ai 9 de mei unì prejentà dal presidënt dla delegazion taliana tl’OSCE Riccardo Migliori y dal presidënt dla Provinzia Durnwalder.
Dl 2008 fovel a Bulsan unì dat ora 19 ndicazions dl OSCE per la defendura dla mendranzes. “La provinzia de Bulsan vën a livel nternaziunel for inò trata ca sciche ejëmpli de cunvivënza dla grupes de rujeneda, perchël se adatea Bulsan nce sciche luegia ulache esperc prejenterà la situazion atuela sce la nazions ie bona te tenì ite la ndicazions de Bulsan” à dit l parlamenter Migliori. Bën 320 parlamenteres da 56 paejes fej pert dl’Organisazion per segurëza y culaburazion tl’Europa. Leprò iel nazions dl cuntinënt American y Europeich sun na linia danter Vancouver y Vladivostok. “L mancia nazions sciche l’Armenia o l Kirghizistan, raions ulache l ne fossa nia tenscions de viera sce i ëssa n sistem sciche tla Provinzia de Bulsan” à dit Migliori. “L’autonomia dl Südtirol ne ie nia n model che n possa tò ca te uni situazion, la possa me jì bën sce n tën cont dla particulariteies dl post“ à dit Durnwalder. “N stat vën valutà aldò de co che l trata i plu dëibli, y propi la mendranzes ie la pert plu dëibla te n stat”.
Pra l seminar ai 20 de mei tl zënter Sheraton a Bulsan se à bele nunzià reprejentanc da 20 nazions. Danter chisc saral truep parlementeres taliani y danterauter nce cumëmbri di guvierns de Rumenia, Slovenia y Ungheria.
as
