Atualità
Barat Stat-Provinzia: puscions contra casermes nueves
USP – L barat danter l Stat y la Provinzia va inant. Da permò iel unì sotscrì n’acurdanza che la Provinzia frabica, concia su o compra sies casermes per i Carabinieri y la Polizia, y giapa lessù puscions stateles che à l medemo valor. “Chësta puscions ie de gran mpurtanza per l svilup de nosta ziteies y luesc” dij l presidënt Luis Durnwalder. Una de chësta casermes unirà nce cumpreda a Badia.
L’acurdanza danter la Jonta provinziela y l’aministrazion statela acioche la Provinzia posse sëurantò puscions dal Stat ie unida sotscrita trëi iedesc, dal presidënt Durnwalder, l cumisser dl guviern Fulvio Testi y dal Giuseppe Tancredi, diretëur dl Ufize dl’Agenzia per patrimone statel a Bulsan. “La puscion che sëurantol la Provinzia ie dutes te na luegia zentrela y perchël de gran mpurtanza per la proietazion urbanistica” dij Durnwalder. Nchinamò fovel strutures fulestieres tla ziteies y ti luesc, do la sëurantëuta possel sun chësta puscions unì fat cuatieres, cëses publiches, butëighes y strutures cun servijes.
Per pudëi sëurantò la puscions che i chemuns ulëssa bele dai ani, se à la Provinzia tëut su de ti pité n miëur albierch ai Carabinieri y ala Polizia tl Südtirol. A Sterzing, Neumarkt y Jenesien uniral frabicà casermes di Carabinieri nueves y a Tluses uniral cumedà ca la sënta di Carabinieri. A Badia uniral cumprà na cësa per pudëi la mëter a desposizion di Carabinieri. La cësa a Persenon per la Polizia unirà sëurandata ala Polizia.
as
