Atualità
Jonta provinziela a una per ncëries tecniches cun manco burocrazia
USP – Per pudëi sëurandé de mëndra ncëries tecniches a maniera plu scëmpla, à la Jonta provinziela nvià via n’acurdanza nueva. Prufescionisc’ che fej pea, possa unì cris ora dal’aministrazions publiches zënza fé uni iede n cuncors a pert.
Per sëurandé nce de pitla ncëries de proietazion, per fé n plann de spartizion per ejëmpl, muessel uni iede unì fat n cuncors. “Chësc reverda duc i lëures per n custimënt de passa 20.000 euro” à dit l presidënt Luis Durnwalder (ncuei) ai 30 de mei do la senteda dla Jonta provinziela. Tl daunì ne dëssel nia plu vester debujen de tan de burocrazia che ne sta nia ite te na relazion realistica cun l lëur nstës.
La Jonta provinziela à dat pro n’acurdanza, a una cun la cameres di prufesciunisć. Aldò de chësta vëniel scrit ora ncëries per 35 categuries de prestazions tecniches (p.e. mplanc contra meldefuech, mplanc saniteres o de segurëza). Proietanc sciche geometri, geologhes, architec o njenieres possa mandé ite si preventives dajan sëura tan de lëures che i ie boni de sëurantò.
L unirà pona fat listes di prufesciunisć a desposizion y nsci possa la Provinzia y i Chemuns i crì ora zënza messëi fé n cuncors a pert. “Cun chësc sistem sons boni de sparanië truep lëur burocratich, tëmp y nce custimënt, ajache l ne ie nia plu debujën de scrì ora i lëures singuli” à dit l presidënt dla Provinzia.
L’acurdanza per la prestazions tecniches vëija dant na soma de 40 milion te cater ani. “Chësc dëssa vester na prova y sce la va bën, pensons nce de la slargë ora a de mëndri lëures da artejan” à dit Durnwalder.
as
