Atualità
Jonta provinziela à dat pro l statut per la Grupa europea de culaburazion teritoriela
USP – L’idea dl’Euregio se cuncretisea for de plu tla Grupa europea de culaburazion teritoriela (GECT/EVTZ) danter la provinzies de Trënt, Bulsan y Tirol. La Jonta provinziela à (NCUEI) ai 6 de juni dat pro la cunvenzion y l statut de chësta urganisazion nueva de culaburazion sëura la sëides steles ududes dant dala Union Europea. Ai 14 de juni uniral firmà ufizialmënter la fundazion.
N var al iede se stluj l cërtl de preparazions tecniches y giuridiches per fé deventé la culaburazion danter Trënt, Bulsan y Tirol na istituzion. De mei ova l Guviern talian cunzedù de mëter su na grupa europea de culaburazion teritoriela cun l inuem Euregio Tirol-Südtirol-Trentino. La Jonta provinziela à śën dat pro la cunvenzion y l statut dla istituzion nueva.
N merdi ai 14 de juni se anconta tl Ciastel Thun, tl Trentino, la trëi jontes provinzieles per sotscrì la fundazion dan nutar. La Jonta provinziela de Bulsan à bele numinà si reprejentanc te chësta urganisazion nueva. L sarà l presidënt Durnwalder y l assessëur ladin Florian Mussner cun i doi vizepresidënc provinziei Hans Berger y Christian Tommasini sciche sostituc.
La Grupa europea de culaburazion teritoriela ie ududa dant dal regulamënt dla Union Europea dl 2006 sciche persunalità giuridica publica, che ie debujën per purté inant la culaburazion interregiunela sëura la sëides de stat. “A Bulsan, Trënt y Dispruch vëniel laurà ora la definizions de chësta istituzion nueva y i programs de culaburazion” à dit Durnwalder. “Do i 14 puderon se dé da fé cun i cuntenuc cuncrec y sustenì nosta populazions ti ciamps che ie de nteres per la trëi provinzies, che va dai trasporc ala defendura dl ambient, la furmazion, cultura, tueda scientifica o culaburazion economica” à dit l presidënt dla Provinzia de Bulsan.
as
