Ambiënt | 06.06.2011 | 15:25

Parëies contra la fuera dla ferata tla val d’Isarch

USP – Sun trëi pertes se mpëia la Jonta provinziela per defënder i zitadins dala fuera dla ferata sun la linia dl Prëner. Sëuraprò a doi programs de pruvedimënc a una cun la Ferata taliana, vëniel nce tëut ca i lëures de cumpensazion da pert dl tunel de basa dl Prëner. Tlo iel 47 milion de euro a desposizion di chemuns.

Dl 2003 fovel unì nvià via n prim program de parëies contra la fuera dla ferata a Persenon. Per chësc ntervënt fova l assessëur Michl Laimer ruvà a una cun la Ferata per l finanziamënt de 10 milion de euro (20% da pert dla Provinzia). “Aldò de chësc program feter finà, iel stat mesun mëter su ntëur 8 chilometri de parëies” à dit l presidënt Dunwalder, ai 6 de juni do la senteda dla Jonta.

N segondo program, nce chësc per 10 milion de euro finanziei dala Ferata y dala Provinzia ie unì dat pro dl 2010. “Te chësc cajo vëniel fat 5 chilometri de parëies te lueges ulache l ie plu debujën“ à dit l presidënt dla Provinzia.

Sëuraprò a chisc doi proiec ruva mo i pruvedimënc de cumpensazion ambientela ududes dant per via dl dann ambientel a frabiché l tunel dl prëner. L se trata tlo de 47 milion de euro per lëures ti chemuns de Furtëza, Freienfeld y Naz-Schabs. La sozietà dl tunel dl Prëner muessa garantì i ntervënc aldò dla prupostes di chemuns nteressei. La Jonta provinziela à ntant cunscidrà y dat pro la dumandes i chemuns. “On udù che l ne ie nia dut ntervënc contra la fuera, ma ulon respeté ulentà di chemuns” à dit Durnwalder.

as