Atualità
Jonta: mulins dal vënt me sce i rënd aldò
USP – Dan lascé pro produzions de strom cun mulins dal vënt, uel la Jonta provinziela tenì cont de plu argumënc. Acioche sibe nce garantida la rentabltà di mplanc, possel me unì fat mulins te lueges ulache l vënt tira cun almanco sies metri al secunt. Chësta lueges ne possa nia vester sëura 2600 metri de autëza.
Ultimamënter se à la Jonta provinziela dat ju plu suvënz cun la puscibltà de fé mplanc dal strom a vënt, lauran nce ora criteries. N fova ruvei la pont che l ne possa nia unì fat mulins dal vënt japé dla valedes, te raions sota defendura ambientela, raions zënza streda da ruvé permez, ulache l ne ie nia assé tlienc, y sëura 2500 metri y ulache l vënt tira n media cun almanco 5 metri al secunt. “Chisc criteries possa me unì tenì ite da cin chemuns. Per ti dé nce la puscibltà a raions dëibli de strutures iel unì dat pro de auzé la sëida da 2500 a 2600 metri de autëza” à dit l presidënt Durnwalder do la senteda dla Jonta (ncuei) ai 6 de juni.
La rentabltà di mplanc ie n auter argumënt che à giapà gran pëis dai assessëures provinziei. Nsci iel nce tlo unì auzà la forza media da 5 a 6 metri al secunt. “Cun chisc criteries nueves pudëssa i mplanc dal strom a vënt unì realisei ti chemuns de Brenner, Sarentin, Renon, Pfitsch, Villanders y nce sun la Plose, l jëuf de Jaufen y sun l Watles” à dit l presidënt dla Provinzia.
as
