Atualità

Politica | 14.06.2011 | 14:46

Sotscrì la culaburazion europea danter Trënt, Bulsan y Tirol

USP – La Grupa europea de culaburazion teritoriela (GECT/EVTZ) danter Trentin, Bulsan y Tirol ie deventeda istituzion. La trëi Jontes provinzieles à (NCUEI) ai 14 de juni sotscrì ufizialmënter l statut de chësta istituzion nueva che fej pert dl’Euregio. Tl Ciastel Thun tla val di Non iel nce bele unì fat ora i argumënc de priorità per la istituzion nueva: mubilità y energia, sanità, economia y nrescida.

L’Euregio Tirol-Südtirol-Trentin à śën na si istituzion. La nascita ie unida ufizialiseda dai trëi presidënc de provinzia Luis Durnwalder, Günther Platter y Lorenzo Dellai che à sotscrì la fundazion dan nutar. La Grupa europea de culaburazion teritoriela (GECT/EVTZ) purterà da mo inlà inant proiec dl’Euregio y reprejenterà nce ufizialmënter la trëi Provinzies canche la se trata de prejenté programs a Brüssel. L mancia me plu che tl Südtirol y tl Trentin vëniel fat la lege aldò.

“Deberieda” ie stat l pensier zentrel dl di tl Ciastel Thun. “Dassëui pudons fé truep, deberieda mo scialdi de plu” à sorissà l presidënt Durnwalder lecurdan l duvier europeich dl’Euregio. “Messon se cruzië che l sibe armunia tl passé da un raion culturel al’auter” à dit Durnwalder. Cun la istituzion dla Grupa europea de culaburazion teritoriela possa proiec che n à deberieda, unì purtei inant plu debota, miec y cun manco custimënc. Dut chësc tl nteres di zitadins. “Sce la populazion ne sënt degun vantajes dal’Euregio, ne possa chësta nce no madurì” à dit l presidënt dla Provinzia de Bulsan.

L presidënt trentin Lorenzo Dellai à sorissà che la trëi provinzies ne à nia me na storia deberieda, ma nce na vijion dl daunì deberieda, “la vijion de n’Euregio 'glocala', sëura i cunfins, cun de plu rujenedes, che se dà da ntënder tres na urganisazion megra che se stiza sun l ufize dl’Euregio a Bulsan.

Per l presidënt dl Tirol Platter ie l’Euregio l daunì: “La deventerà na region model tl’Europa, n turbo per nosc proiec deberieda” à dit Platter rujenan dla fundazion dl GECT sciche n var inant, te chël che n dëssa nce ti cialé a cie che ie realistich.

La trëi jontes provinzieles à bele metù dant i argumënc de priorità per la istituzion GECT, che dëssa unì coordinei tla trëi provinzies. Te chësc cheder dëssel unì purtà inant l proiet ambiziëus dl Corridor vërt dl Prëner. Chësc dëssa unì metù a jì n culegamënt cun l tunel dl Prëner y dëssa cunlië cunzec inuvatives cun formes nueves de produzion energetica. La se trata de se nuzé dl ciaut tl tunel dl prëner, dl vënt, dl surëdl y dla biomassa, ma nce de na rë de stazions dal strom sun streda y la produzion de idrogenn.

N auter pont zentrel ie la sanità. La trëi provinzies ie ruvedes a una de culaburé de plu tla furmazion dl personal per l sanità. Cun la coordinazion dl’Euregio dëssel nce unì purtà inant proiec de nrescida sciche per ejëmpli tl ciamp dla nrescida sun l tumor. Na nota particulera ti ie unì dat al nuzé de plu l potenzial che cumporta l barat digitel sun la sanità (eHealth). L barat porta a na culaburazion plu stënta danter istituzions de sanità y na cunsultazion plu debota danter specialisć de spedei defrënc.

Mpurtanza ti dà l’Euregio nce a nrescida y furmazion tl cheder dl’atività dl GECT. Per sparanië ressorses dëssa la universiteies y la istituzions de nrescida dla trëi provinzies lauré te na culaburazion plu strënta y coordiné proiec de nrescida. N program per n barat de sculeies y na culaburazion culturela dëssa sëuraprò nce sustenì l tenì adum tl’Euregio.

Na cooperazion a n livel plu strënt ulëssen nce arjonjer tl’economia canche la se trata de retlam per l‘Euregio sciche destinazion economica o turistica a livel nternaziunel. La istituzion GECT ti stajerà nce do a miuré la culaburazion canche la se trata de fé Lobby per l lëur da paur tla montes.