Atualità
Cunsulta per n majer sustëni al’ativiteies cultureles ladines
USP – L sustëni finanziel per la cultura ladina da pert dla Provinzia de Bulsan dëssa tenì cont mo de plu dl’ativiteies che vën fates tla valedes ladines. Chësc ie unì ora dal’ultima senteda dla Cunsulta culturela che ie stata chëst ena passeda a Bulsan.
Per l ann 2011 fovel dlongia l’ativiteies cultureles nce udù dant n sustëni economich per vel nvestizions a bën dla cultura ladina. “Per velch de chisc proiec che an pensà de sustenì da pert dla Provinzia iel stat mesun abiné n aiut tres la Region” spiega l assessëur Florian Mussner. A chësta maniera possel unì adurvà chisc mesuns per sustenì l’ativiteies cultureles. L’bujën de sustenì de plu l’ativiteies à doi rejons. Da una pert iel for de plu lies y assoziazions che damanda n sustëni economich per si ativiteies cultureles. Dal’autra pert se stënta la lies cultureles for de plu a abiné finanziamënc alternatives. Ti ani passei fovel mo de plu sponsorisazions che judova a curì l finanziamënt de manifestazions cultureles dla lies, chëstes ti mancia bel plan ai urganisadëures.
Per pudëi dé n majer sustëni provinziel al’ativiteies cultureles ladines iel debujën de spusté spusté scioldi da un capitul al’auter. Chësc possa mé unì fat cun lege provinziela, per chëla che l vën śën anjenià la documentazions aldò. N fej cont che chësta lege possa jì n drova d’autonn, iló puderal pona unì spartì su i scioldi.
La Cunsulta culturela ie nce stata a una de dediché l Di dla cultura ladina ala Cumpëida dla jënt che unirà fata d’autonn. Ai 30 de setëmber iel danterauter udù dant de traté l valor dla detlarazion de grupa de rujeneda per i ladins te n cuntest europeich.
Ala senteda dla Cunsulta culturela, ai 15 de juni, à tëut pert l assessëur ladin Florian Mussner sciche presidënt, Hilda Sottara, Bruno Senoner y Lois Ellecosta.
as
