Desvalì | 20.06.2011 | 17:16

Tarifes nueves per l trasport tenian cont de families y pendolares

USP – Da plu mënsc oven scumencià a lauré tl sistem dla tarifes dl trasport publich, la Jonta provinziela à (NCUEI) ai 20 de juni dat pro l sistem nuef. L ie unì mantenì l prinzip che premia chiche furnea de plu y sëuraprò iel mo unì udù dant reduzions per families y pendolares.

Bele de fauré fova la Jonta provinziela stata a una de mëter a jì n sistem da abunamënt cun chël che n possa adurvé duc i mesuns publics de trasport tl Südtirol. Chësc unirà fat te chëla che a zapé ora vëniel trat ju l priesc da na cherta che n à dant ciarià do l prinzip de na cherta dal telefonn. “L fin dla Jonta provinziela ie chël de mutivé la jënt a adurvé de plu i mesuns publics y nce de i premië” à dit Luis Durnwalder do la senteda dla Jonta.

Aldò dl cunzet dl assessëur Thomas Widmann depënt i priejes dala soma de chilometri che n furnea al ann. Per i prim 1000 chilometri paien 8 cent al chilometer, da 1001 a 10.000 cater cent, da 10.001 a 20.000 me plu doi cent. “Sëura 20.000 chilometri al ann possen furné debant cun mesuns publics” à dit Durnwalder.

Da nuef ie che genitores de muntons nchin a 18 ani giapa priejes lascei do. Per i prim 1000 chilometri paia ëi me sies cent al chilometer, nchin a 10.000 chilometri trëi cent y nchin a 20.000 chilometri, doi cent. A chëst maniera paia n genitore al plu 530 euro al ann mpede 640 euro.

Families à de plu vantajes. Mëndri nchin sies ani furnea defin debant. Sculeies nchin a 18 ani possa cun l Abo+ furné te duta la provinzia zënza paië. Studënc y lerneri giapa l abunamënt per dut l ann per 150 euro y śën iel mo unì lascià do la tarifes per families.

Tenì cont an nce de chëi che à bele n abunamënt o na cherta per families. N auter ann ti uniral lascià do n scialier de 500 chilometri. Chësc uel di che i furnerà me i prim 500 chilometri al priesc plu aut y passerà pona riesc tla categuria plu bassa.

L adatamënt dla tarifes udù dant per scumenciamënt dl 2012 vën do 15 ani che l ne ie nia unì mudà i priejes y nianca adatei ala nflazion. “Te chësc tëmp ons perchël miurà dassënn l servisc” sorissea l assessëur Widmann.

as