Atualità

Aministraziun | 18.07.2011 | 16:22

Jonta provinziela ne vëij deguna rejon per se paré dala manovra de sparani

USP – Diretamënter o nce nia diretamënter arà la manovra de sparani dl Guviern talian na fazion sun Südtirol. Ma davia che n se aspieta mo mudazions ne vëijen sën nia l drë mumënt per se paré. Chësta ie stata la cuntlujion dla Jonta provinziela, (ncuei) ai 18 de lugio, n cont dla manovra de sparani.

„Śën se mostra l’acurdanza de Milan danter Provinzia y Stat Talian sciche gran fertuna. Chësta acurdanza nes dà segurëzes n cont dla ntredes y nce sun la pert dla spëises. Tl’acurdanza de Milan se à nce l Stat tëut su n mpëni de nosc vieres“ à sorissà Luis Durnwalder do la senteda dla Jonta provinziela n cont dla basa finanziela dl’Autonomia n relazion ala manovra de sparani dl Stat.

La Jonta provinziela se à ti si senteda tëut d’aurela de ti jì plu sot a chësc argumënt. Nsci iesen ruvei al pont che l Guviern a Roma à fat n var che n messova fé. Aldò de Durnwalder muessa la Talia fé velch sce la uel se la cavé cun si gran mont de debic. Per chësta rejon fajerà nce l Südtirol si pert a na maniera che l Stat posse smendrì si debit.

Ajache la Provinzia uel judé pea, ma dantaprima ajache l unirà mo do d’autri pruvedimënc, ie i assessëures stai a una de nia se paré te chësc mumënt contra la manovra de sparani. „On bele dit che ne ulon nia paië doi iedesc. Bonamënter uniral mo fat n segondo decret, permò canche chësc sarà anjenià cialons inant“ à dit Durnwalder. L presidënt à nce dit de mo nia savëi sce la manovra dl Guviern arà cunseguënzes sun l IRPEF y IRAP. „Cialeron avisa cie che suzed a Roma per reagì tl drë mumënt“ à fat al savëi Durnwalder.

as

Galaria dales fotografies