Atualità
Furmazion prufesciunela fajerà pert di departimënc de educazion
USP – La Jonta provinziela à (ncuei) ai 18 de lugio dat pro de mëter la furmazion prufesciunela pra i departimënc de educazion a na maniera da mëter a jì da nuef l sistem de furmazion a na maniera plu megra y plu efizienta. La reorganisazion dla ciamp dla furmazion ie me na pert de n majer pachetl de pruvedimënc che la Jonta provinziela uel purté inant ti proscimi mënsc per smëndrì la burocrazia.
La fundamënta per mëter a jì da nuef l’aministrazion dl ciamp dla furmazion fova bele unida fata cun la lege finanziaria 2010. Iló iel unì udù dant trëi vares per miuré l sistem de furmazion n cont de efizienza. L fova unì fat ora de tò demez i istituc pedagogics, la repartizion per la furmazion prufesciunela y i istituc de educazion musichela te si forma tradiziunela. Cun l ann 2011 ie unic tëuc demez i Istituc Pedagogics sciche istituzion, i juntan ai departimënc de educazion.La Jonta provinziela à śën dat pro l segondo var. Ai prim de setëmber 2011 dëssa i departimënc de educazion sëurantò la furmazion prufesciunela, scebën che la Jonta provinziela à udù dant na forma che garantësc n’autonomia funziunela y la garanzia dla particulariteies dla furmazion prufesciunela. Per la pert ladina uel chësc di cuncretamënter che la Scola prufesciunela a Urtijëi unirà aministreda deberieda cun l’autra scoles autes dla valedes ladines.
Per i assessëures ala scola, Mussner, Kasslatter Mur y Tommasini fovel gran ëura de chësta reorganisazion. ALdò de Durnwalder ne uniral cun chësta trasfurmazion de repartizions nia straicà stieres y i respunsabli resterà inant te si ncëria.
L terzo var dla reorganisazion ie udù dant per l prim de setëmber 2012 canche l unirà tëut demez l’istituzion de Istituc per educazion musichela, i juntan pra i departimënc de educazion.
La urganisazion nueva dl ciamp dla furmazion ie na pert di pruvedimënc dla Jonta provinziela per smëndrì burocrazia.
as
