Atualità
Giaurì l troi geologich sa Bula
USP – La defrënta sortes de sas sëura la streda da Bula ie cunesciudes danter i geologhes de livel nternaziunel ajache tlo se à mantenì drët bën sasc che se ova furmà dan feter 252 milion de ani. Chësta defrënta sortes de sas possen sën vijité drët saurì jan sun l troi geologich che unì giaurì (ncuei) ai 22 de lugio dal presidënt dla Provinzia Durnwalder y dal assessëur Florian Mussner.
“Massa suvënz passon via ala particulariteies de nosc raions zënza cunscidré assé la natura”, nsci Durnwalder pra la giaurida. Cun 8 tofles de nfurmazion, scrites te cater rujenedes, possen cunëscer miec la storia de nosc planet. “Chiche cunësc miec l ncësa, l sciazea nce de plu“ à dit l presidënt dla Provinzia. “La pusciblteies dl daunì ie da abiné tla natura” à dit l assessëur Mussner. L troi nuef ne ie reprejentea nia me la cumbinazion danter daunì, storia, furmazion y cultura, ma l cunlieia nce a livel europeich. “Tlo al laurà geologhes dl Südtirol y nce dl Tirol” à dit Mussner.
L troi nuef ie unì fat sun ncëria dl Ufize provinziel Geologia deberieda cun l Ufize per i Parcs naturei, l Chemun da Ciastel y l sustëni dl’università de Dispruch. L prufessëur Rainer Brandner dl Istitut per geologica dl’Università de Dispruch y Lorenz Keim dl Ufize provinziel per geologia à njenià tofles sun chëles che l vën prejentà la storia de evoluzion dla Dolomites, recunesciudes dal’Unesco.
L troi geologich possen jì saurì te trëi ëura. N possa muever dala fermeda dla curieres sun Pas Pinei, da iló ti van do al troi 3a y pona inant sun la streda da Bula che ie unida sareda cun l giaurì tl tunel. Da iló posse jì inant nchin pra l luech da Zaramin a na autëza de 1603 metri.
Deberieda cun la tofles de nfurmazion iel nce unì dat ora n cudejel de nfurmazion che ie da giape tl ufize turistich de Urtijëi, tla ustaries da Bula y tl Museum dla natura a Bulsan.
as
Galaria dales fotografies
Mussner, Durnwalder y Nössing à giaurì l troi geologich sa Bula.
