Atualità
Oswald von Wolkenstein ai 12 de agost te Sëlva
USP – N vënderdi ai 12 de agost uniral tl Tublà da Nives te Sëlva giaurì la mostra tal titul „Oswald von Wolkenstein in Art 1961-2011“. L unirà mustrà retrac dl ciantautor, poet, cumponist y politich che ie unic fai ntan i ultimi 50 ani da 14 artisc tudësc, svizeri y dl Sudtirol. La giaurida sarà dala sies da sëira.
Nasciù l ann 1377 tl ciastel Trostburg a Pruca, se à Oswald von Wolkenstein fat inant nchin a deventé una dla persunaliteies plu stravagantes dl Tirol tl medieve tert. Cun me un n uedl ma na gran ulentà de se fé valëi iel stat bon de se fé inant a deventé fant dl rë Sigmund (dal 1415) y pona nchinamei ciavalier de rëni (dal 1434). Oswald dla cësa von Wolkenstein fova drët bon de musa, n poet y cumponist che cun si cianté y fé mujiga à fat cianties che testemunieia mo ncueicundi l’ert dl Lied tl raion de rujeneda tudëscia. Te si tëmp tla segonda metà dl 15esim secul se al for inò dat da fé tla politica de raion, nchin a si mort l ann 1445.
Vin, ëiles y cianté, deberieda cun d’uni sort de matades y ntraunides fetres ntan si viages ie unides tëutes sciche argumënc de na lingia de chedri. Tla mostra „Oswald von Wolkenstein in Art 1961-2011“ saral da udëi 94 chedri che 14 artisć de rujeneda tudëscia à tl ultimo mez secul fat per dé inò vita al mytos de Wolkenstein.
La scumenciadiva dla mostra vën finanzieda dal Museum Ladin Ćiastel de Tor y dal Chemun de Sëlva.
La mostra unirà giaurida dal assessëur provinziel ladin Florian Mussner, l curadëur Hans-Dieter Mück, l ambolt de Sëlva Peter Mussner, l cunselier de chemun Dietrich Mussner y l diretëur dl Museum Ladin Stefan Planker.
Culaburadëures di media i nviei ala giaurida
n vënderdi ai 12 de agost, dala 18.00
tl zënter culturel Tublà da Nives
streda Val 2 te Sëlva
y de cunedì la scumenciadiva.
as
