Aministraziun | 08.08.2011 | 14:04

Manco burocrazia per cuntribut a families y rendiconc intenres

USP – Cun la ntroduzion dla detlarazion unificheda de davani y avëi, puderà la families dal prim de setëmber fé na sëula detlarazion. La Jonta provinziela de Bulsan à (NCUEI) ai 08 de agost dat pro i criteries y la modaliteies per l cuntribut a families y l paië ora la contes per via telematica sparanian a chësta maniera na bela pert de burocrazia.

Per giapé cuntribuc ti ciamps ulache l vën pità servijes publics, univel nchinamò valutà l davani y l avëi. Dal prim de setëmber possen per dumandes de cuntribuc tl ciamp soziel y dla sanità, se nuzé de na scemplificazion. L puderà unì dat ju na detlarazion unificheda de davani y avëi (redditometro) a na maniera da smëndrì la burocrazia tres l aiut de n formuler sëul y na banca dates zentraliseda. “Cun chësc sistem nuef puderà l zitadin che damanda de pudëi se nuzé de de plu servijes, me de jù una na detlarazion al ann. Chësta unirà pona tëuta ca sciche basa per de plu ciamps ulache l ie unì fat dumanda.

La Jonta provinziela à adatà i criteries y la modaliteies per l cuntribut a families cun mëndri nchin a trëi ani de età. Deberieda cun l cuntribut regiunel ala families vëniel te n ann mandà ite de ndut 33.000 dumandes y fat na spartizion de 44 milion de euro. L sistem nuef de detlarazion scumëncia cun l prim de setëmber ajache l ie nce la data per damandé da nuef l cuntribut ala families. Chësta dumandes per families cun mëndri nchin a trëi ani adroven me da fé un n iede per duc i trëi ani. De setëmber posseles unì dates ju tres i patronac o caaf. “Per i zitadins ne dëssel nia vester spëises a dé ju chësta dumandes ajache la Provinzia à udù dant n paiamënt per i servijes che manda inant la dumandes” à dit l vizepresidënt dla Provinzia Hans Berger.

Per smendrì la burocrazia à la Jonta provinziela nce dat pro na scemplificazion dla pruzedures de cuntrol tla repartizions provinzieles. Nsci possa internamëter me plu unì mandà inant contes da paië ora sun via telematica. “A chësta maniera se lascel nce fé i cuntroi plu saurì y i cuntroi puderà unì smendrì da 20% a 6%” à spiegà l vizepresidënt dla Provinzia Hans Berger, che à menà la senteda dla Jonta provinziela.

as