Desvalì | 09.08.2011 | 16:07

Internet tres fires otiches: i laûrs va inant debota – informaziuns ince tl video

Acioche i dac digitai röies tl Südtirol y pois ince gnì anuzà tl Südtirol zënza restè impifà, investësc la Junta provinziala dassënn tla rëi de coliamënc cun fires otiches. “I mioramënc cun fires otiches é ipormò le secundo vare, do che i ùn bele fat laûrs acioche feter döt le raiun vëgnes curì cun coliamënc a banda leria” insciö l’assessur Florian Mussner. Les informaziun sön i laûrs é ince da odëi te n video por ladin.

Feter te vigni comun él bele meso da se colié a internet tres banda leria. Ajache chësta poscibilité vëgn te de plü caji dada tres coliamënć a ones radio, che é plü bun marćé mo inće plü zities por ći che reverda i desturbs, fej la Junta provinziala de majeri laûrs. “I s’ùn tut dant de arjunje ćina dl 2013 düć i comuns cun la rëi de fira otica” dij Mussner. Ćiudì pa fira otica? “La fira otica é te chësc momënt y, aladô de sciöche ara ćiara fora, inće ti proscimi tëmps la miù soluziun por i coliamënć de dać digitai” spliga l’assessur. Les fires é lisieres, se storj saurì y garantësc coliamënć aslöms zënza gnì desturbà da condiziuns esternes. Singolarmënter éres feter tan leries co n ćiavëi, mo tacades adöm mëneres inant de plü Gbit de dać al secunt, che é de plü milesc de Mbit.

Les fires otiches à inće na pert manco positiva: “Mëte jö i cabli é dër ćer” dij l’ assessur. Por chësta rajun fej la Junta n vare al iade por mëte jö i coliamënć. Naôta vëgnel metü jö ros öć. Chësc vëgn fat canche al vëgn impò ćiavè sö les strades y scenò ćiavan sön na picia striara. “Te n secundo tëmp vëgnel trat tres chisc ros les fires otiches” dij Mussner. Te chësc momënt vëgnel laurè te düć i raiuns dl Südtirol.

Cun l’arjunje di comuns cun les fires otiches, concretamënter les ćiases de comun, i sorvij de sanité, les scores, i ufizi raionai, le cataster y les zentrales de proteziun zevila, les ćiases de cultura, les biblioteches y les staziuns di repetidus, à la Provinzia fat süa pert. “Plü inant ne podunse nia jì, ajache le dërt europeich ne conzed nia che la Provinzia laores sön l’ultima milia”, dij l’assessur. L’“ultima milia”, le coliamënt danter la rëi y les ćiases, é resservada ai manajadus privać. “Por ëi ne n’él do nüsc laûrs nia plü da fà de gran investimënć” dij Mussner.

Chi che ô se fà n’idea sön les fires otiches y le coliamënt internet aslöm, y sön tan inant che i laûrs é, ciafa les informaziuns tl video por ladin sön les plates internet dl ofize stampa (www.provinzia.bz.it/usp-ladin y dl assessur por les infrastrotöres (www.provinzia.bz.it/mussner).

as