Atualità
Cumpedà n chert de duta la families – 55% a Badia
USP – La Cumpededa dla jënt va inant drët bën tl Südtirol. L Istitut de statistica ASTAT mostra su che n chert de duta la families ie bele unì cumpedà. Chësc ie stat mesun davia che truep zitadins se nuzea dla puscibltà online – de chisc nen iel bele 50.000. I zitadins dl Chemun de Badia ie cun 55,15% i segondi plu lezitënc dla provinzia n cont de se nuzé dla puscibltà tres internet.
Do avëi arjont i 25.000 ai 18 de utober, iel nianca diesc dis do bele unì arjont i 50.000 zitadins che à respundù al cuestioner tres internet. (NCUEI) ai 27 de utober iel unì cumpedà 51.734 cuestioneres online. “A chësta maniera ons bele giapà ite la cumpëides de feter n chert de duta la families dl Südtirol” spiega Johanna Plasinger, diretëura dl ufize ASTAT per statistica dla populazion. Che l ie bele tanc che à respundù tres online juda dassënn i lëures de nrescida, ajache a chësta maniera vëniel sparanià truep lëur a dé ite la respostes tl sistem digitel. Nsci vëniel nce schivà fai.
Te duta la provinzia iel doi chemuns ulache plu de mesa la populazion à bele respundù ai cuestioneres tres internet. I zitadins plu lezitënc ie chëi de Laurein ulache 57,14% à fat pea online. Riesc do vën i zitadins dl Chemun de Badia che à arjont l 55,15% online. I chemuns che vën do ie mo sot al 50%, sciche Villanders (48,53 percënt), Partschins (46,57 percënt), Welsberg-Taisten (45,57 percënt) y Furtëza (44,01 percënt).
Duta la nfurmazions sun la pusciblteies de respuender al cuestioner ie da pudëi liejer do sun la plata web dl ASTAT (www.provinzia.bz.it/volkszaehlung). Tres chësta plata ruven nce pra l cuestioner online che possa unì respundù cun l login che ie sun la lëtra dl ASTAT mandeda n cësa.
Spiegazions sun l sistem y la pusciblteies de dé ju la respostes ala Cumpededa dla jënt cun detlarazion de grupa de rujeneda vën nce dates tres l video per ladin sun www.youtube.com/ProvinziaBulsan.
as
