Atualità
Seguré la cures y lege sun la familia ie la prioriteies de Theiner per l 2012
USP – Per n auter ann iel udù dant de dé ora passa 178 milion de euro per seguré la cures, chësc ie 6 milion de plu permez a chësta ann. Chësc à cunedì l assessëur Richard Theiner, (NCUEI) ai 25 de nuvëmber ntan la cunferënza stampa de prejentazion dla prioriteies tl bilanz 2012. De setëmber fejen cont de avëi laurà ora la lege nueva per la families.
Tl bilanz de previjion 2012 iel udù dant 178.644.201 euro per l fond da seguré la cures. Tenian cont de mo d’autra 30 milion da pert dla Region, ruven a na soma de passa 208 milion de euro. Permez a chëst ann uniral nsci dat ora 6 milion de plu. Chësc va a una cun l program finanzier laurà ora dan cin ani canche n ova nvià via l seguré dla cures. “La mudazion demografica de nosta sozietà, nsci l assessëur ala families, sanità y soziel, se damanda chisc nvestimënc. Te chësc mumënt iel 2,9% dla populazion dl Südtirol che giapa uni mëns n aiut finanziel per la cures. Chësta perzentuela ie plu auta permez al Deutschland, da ulà che n se ova cialà ju l model. La defrënza ie che tl Südtirol vëniel nce tëut n cunsciderazion i caji tuchei da demenza” à dit Theiner.
De ndut iel 14.599 persones che giapà n cuntribut per la cura. 10.790 de chisc vif a cësa, i autri 3.809 te strutures. De ndut iel udù dant 417,5 milion per l ciamp dla families y soziel. “Nia me ajache la sozietà devënta for plu vedla, ma nce ajache son te na crisa economica, ne iel nia plu mesun garantì l medem standard de assistënza. La priorità à te chësc mumënt la pert plu dëibla dla populazion” nsci l assessëur.
N pont zentrel per Theiner tl 2012 sarà l lauré ora dla lege per la families. Te chësc mumënt vëniel laurà ti cumiteies y per setëmber fejen cont de purté la pruposta te Jonta provinziela. Cun la lege nueva ulëssen mëter adum duc i cuntribuc per la families y sustenì la vita danter lëur y familia. L vën nce laurà sun na cherta per families cun chëla che n giapëssa priejes lascei do.
Per la sanità à la Jonta provinziela dat pro 1,71 miliardes de euro. Chësc fej ora passa la cuinta pert de dut l bilanz provinziel y ie esprescion de gran priorità te chësc mumënt de reforma. “I scioldi a desposizion ie i medemi sciche chëst ann, ma la cumpëida de pazienc crësc” à dit Theiner. Ti ultimi ani an cialà de mantenì l standard aut dla prestazions de sanità, nce sce la cundizions basa ie mudedes defin. Chësc ie me mesun tres la reforma che son tl lëur de tré tres.
as
