Atualità
Cunselieres dla SEL jëuni y cumpetënc
USP - Wolfram Sparber presidënt, Giovanni Polonioli vizepresidënt cun leprò Sibylle Überbacher y Verena Brunner: chisc ie cater de ndut cin cunselieres dl cunsëi de aministrazions nuef dla sozietà provinziela SEL che la Jonta provinziela à (NCUEI) ai 28 de nuvëmber nciarià sun pruposta dl assessëur Laimer. La reprejentanta ladina, Romana Taibon devënta la prima ëila, presidënta dl cunsëi de verdia dla SEL.
L assessëur Laimer à purtà dant ala Jonta provinziela la pruposta dl cunsëi de aministrazion nuef laurà ora deberieda cun i chemuns. Sciche patron de maiuranza à la Provinzia l dërt de numiné cater de cin cunselieres (l cuinto vën numinà dai Chemuns tres la SELfin) y l presidënt dl cunsëi de verdia. Ufizialmënter unirà l cunsëi de aministrazion nuef numinà n mierculdi 30 de nuvëmber tla reunion generela.
L unirà purtà dant Wolfram Sparber sciche presidënt, Giovanni Polonioli sciche vize deberieda cun Sibylle Überbacher y Verena Brunner. Cun Romana Taibon saral per l prim iede n’ëila a cë dl cunsëi de verdia dla SEL. “Duta la persones prupostes à la carateristiches che ie per me de ublianza per nvië via n scumenciamënt nuef y na generazion nueva: les ie cumpetëntes, mparzieles y jëunes” à dit Laimer do la senteda dla Jonta provinziela.
Co che dëssa unì a se l dé chësc scumenciamënt nuef spiega l presidënt nuef: “Mpurtant me sa de purté ite gheneda te chësta firma, de mparé a cunëscer i culaburadëures y de scumencé a lauré deberieda a na maniera costrutiva” dij Sparber, “a una cun i patrons uniral a se l dé nuviteies morales, de comunicazion y de cuntenuc”. Sparber rejona de n còdesc de unëur che vën metù dant per scrit ala persones che mëina la SEL. Gran pëis uelen dé a na comunicazion davierta y trasparënta cun duta la grupes che toca leprò. I cuntenuc dëssa dantaprima fé referimënt ala prestazions dla SEL cialan danora a pité n servisc che dura tl tëmp.
Wolfram Sparber, 35 ani de Bulsan, à studià fisica aplicheda a Graz y Barcelona. L ie recunesciù sciche spezialist tl ciamp dl’energia, dantaprima per sistems de energia alternativa. Chësc ie nce testemunià da si posizions te assoziazions europees per energia y scienza. Ti ultimi ani al menà l Istitut per energia da adurvé mo dl EURAC. Speriënza nternaziunela se à Sparber nce fat sciche prufessëur te universiteies talianes y giaponejes canche l fova pra l cunesciù Fraunofer istitut per energia dl surëdl a Freiburg. Ël rejona tudësch, talian, nglëisc, spanuel y grech. Dan vester ruvà pra l’Eurac al menà l zënter regiunel per energia da adurvé mo Renertec tl Innovation Park TIS.
Vizepresidënt dëssa deventé Giovanni Polonioli, 44 ani de Bulsan. Dal 1997 iel aucat che se dedichea a lëures publics y cuntrac. Dal 2005 al 2010 iel stat ambolt de Leifers, cumëmber dla SAD, SEAB y dl cunsëi de aministrazion dl’Assoziazion di chemuns.
Sibylle Überbacher, 38 ani de Lana lëura da cunsulënta autonoma per marketing, svilup d’urganisazion, strategia, comunicazion nterna y externa. La diplomeda per economia aziendela tën nce lezions pra de plu urganisazions sciche l’università de Bulsan o pra l TIS.
Verena Brunner, 31 ani de Valdaura, à studià dërt talian y psicologia a Dispruch y Milan. Do plu ani te n avocatura ala dl 2008 nstëssa giaurì n’avocatura. I ciamps speziei ie i cuntrac, dërt de familia y de arpejon.
Romana Taibon, 41 ani, ie de Al Plan de Mareo. Ëila ie cunsulënta de dërt naziunel y nternaziunel dla chëutes pra l studio “Hager&Partners” a Milan, per i ciamps de energia (dantaprima fotovoltaich), cumerz y ndustria. Taibon à studià economia y ie bele passa 14 ani cumerzialista y revisëura de conc.
as
