Atualità
Jonta provinziela fej recurs ala manovra de sparani de Monti
USP – L ne ie mo nia tler co che unirà a cialé ora la manovra de sparani dl Guviern Talian, ma per la Jonta provinziela iel tler che n fajerà recurs per giapé na pert dla chëutes straurdineres y per pudëi marciadé mo dan fé adatamënc al sistem de finanziamënt provinziel. L presidënt Durnwalder à (NCUEI) ai 12 de dezëmber fat al savëi che la Jonta provinziela à bele dat pro de fé recurs a n prim decret.
Mo ne ie la manovra de sparani nia passeda tl Parlamënt, perchël iel mo da aspité sce l vën fat mudazions “ne pudon mo nia di avisa ciuni che ie i ponc che ulon cuntrasté” à dit l presidënt dla Provinzia do la senteda dla Jonta. Tler iel che n uel fé recurs al dërt che l Stat uel se fé valëi de se tenì duta la chëutes spezieles nueves. “Aldò dl’Acurdanza de Milan ons l dërt de 90% de duta la chëutes y chësc dërt ulons nce se fé valëi” à dit Durnwalder.
Na segonda rejon per fé recurs reverda dl dërt, segurà dal’Acurdanza de Milan, che l sistem de finanziamënt dl’Autonomia possa me unì mudà sce Stat y Provinzia ie a una. Na mudazion me da una pert jissa contra l dërt, perchël uel la Jonta provinziela tenì sun l dërt de marciadé.
Per chësta doi rejons, per la pert sun la chëutes y l dërt de marciadé, à i assessëures provinziei ncuei dat pro de fé recurs ala prima manovra (decret 183) dl 12 de nuvëmber.
Trupa pertes dla manovra nueva ne ie nia tleres. Nsci co che la nueva chëuta sun la frabiches IMU dëssa unì trata ite tla regions autonomes, tant che ti resta ai chemuns y tant che ti va al Stat. “Tl decret iel nce scrit che i chemuns tla regions autonomes, muessa dé ju de ndut 60 milion de euro, che fajëssa ora 12-15 milion dala Südtirol” à dit Durnwalder.
Nia tler ne iel co che la jirà cun la chëuta sun l davani IRPEF ulache semea che la jonta regiunela muessa unì auzeda a 1,23%. La Jonta provinziela ie dla minonga che l Stat possa auzé l IRPEF, ma nia la njonta regiunela. L dëssa vester cumpetënza dla Provinzia a lascé la njonta al 0,9% y de tò ju pëis ala families y lascé do duta la njonta a na bela pert dla populazion.
Co che la Jonta provinziela uel se muever n cont dla manovra de sparani dëssa mo unì fat ora ntan chëst’ena te na senteda straurdinera, i dis che l unirà fat la descuscion sun l bilanz te Cunsëi provinziel. “Sëuraprò ons fat ora de fé na tlausura de jené per se dé ju cun la cunseguënzes dla manovra” a cunedì Durnwalder fajan referimënt ala liberalisazions ududes dant per i mestieres y firmes (orars de giaurida).
as
