Aministraziun | 19.12.2011 | 16:21

Nuzé i 100 milion aldò dl’Acurdanza de Milan

USP – Mpenian i finanziamënc se anjenià la Provinzia a sëurantò la Posta y la RAI. La se trata de 100 milion de euro udui dant dal’Acurdanza de Milan che vën n pert adurvei per chemuns che va a sëida y na majera pert per finanzië cumpetënzes nueves.

40 milion de euro al ann dëssa dal Südtirol (la medema soma nce l Trentin) ti jì a chemuns che va a sëida. Tlo iel mo dificulteies de nterpretazion. „Per nëus iel tler che nosc scioldi dëssa me unic adurvei per i 9 chemuns che va a sëida cun la provinzia de Bulsan, y nia ruvé te n poz cun i scioldi dl Trentin per ruvé a chemuns che va me a sëida cun l Trentin“ à di l presidënt Durnwalder, (NCUEI) ai 19 de dezëmber, do la senteda dla Jonta.

Di 40 milion che ie unic dai pro vëniel trat ju 2,3 milion per paië la pert dla Lombardia a finanzië l parch naziunel dl Stelvio. La Jonta provinziela à mo dan la fin dl ann nce mpenià l’autra 60 milion de euro. 2,3 milion vën adurvei per finanzië la pert dl Südtirol dl Parch naziunel dl Stelvio, 5 per l conservatorio de Bulsan, 2,2 milion per la pert dl Stat a finanzië l’università de Bulsan. Segurà iel nce l finanziamënt per doi proiec dl daunì: feter 20 milion de euro per sëurantò la RAI de Bulsan y leprò nce i scioldi per sëurantò l servisc dla posta tl Südtirol. Tl’ultima senteda dan Nadel à la Jonta nce segurà l finanziamënt per cumpré l grunt da frabiché la perjon a Bulsan.

as