Atualità

Politica | 02.02.2012 | 16:15

Ancunteda cun Monti (2): normes de atuazion dl Statut y persona de referimënt

USP – No me l model nuef de finanziamënt (comunicat a pert), ma nce la normes de atuazion dl Statut de Autonomia, la cunzescion per l’autostreda, la posta y na persona de referimënt tl Guviern, ie stai d’autri ponc dl’ancunteda danter l presidënt di ministri Mario Monti y i presidënc dla provinzies de Bulsan y Trënt, Luis Durnwalder y Lorenzo Dellai, (NCUEI) ai 02 de fauré a Roma.

Truepa dla cuestions daviertes danter l Guviern a Roma y la provinzies autonomes de Bulsan y Trënt ie gaujedes dal mancë de n barat cun l Guviern. “On damandà de unì trai ite per tëmp y plu dassënn canche la se trata de cuestions che nes reverda, a na maniera da pudëi prejenté nosta vijions mo dan che l vën tëut na dezijion” à dit l presidënt Durnwalder do l’ancunteda. N prim var cuncret iel bel unì fat te chëla che n à giapà na persona de referimënt dl Guviern. Chësta unirà numineda ntan i proscimi dis dal presidënt di ministri nstës.

L cuntat diret cun l Guviern ie debujën ajache la lingia de cuestions da stlarì danter Bulsan, Trënt y Roma ne reverda nia me l model de finanziamënt nuef y i paiamënc da pert dla Provinzies per judé a curì l busc finanzier dl Stat. I presidënc dla provinzies ti à sëurandat a Monti duta na lista. Tlo iel nce l bujën de dé pro plu riesc la normes de atuazion per n terzo cunselier de Stat, l bilinguism pra cuncorsc de stieres te suneria y la ndicazion urganisativa per l parch naziunel dl Stelvio. Tl promemoria per Monti iel nce ulëi dé pro la Cumiscion di 6 te si furmazion nchinamò o de ulëi la numiné da nuef.

L mancia nce l bënsté dl Stat ala pruposta dla Jonta provinziela de sëurantò l servisc dla Posta, de pudëi regulamenté nstësc l’abineda dl refudam o de finanzië nstësc i programs dla RAI ladina y tudëscia. Tramedoi provinzies se damanda nce che l vënie spënt l scrì ora dla cunzescion nueva dl’autostreda. “Chësc ie debujën sce ulon deberieda cun l Guviern abiné na soluzion che vede bën a tramedoi pertes, ma dantaprima per defënder l ambient y l finanziamënt per l tunel dl prëner” à dit Durnwalder.