Atualità
Jonta provinziela à dat pro la pruposta de lege n reazion ala liberalisazions
USP – La Jonta provinziela à dat pro la pruposta de lege dl urdenamënt per l cumerz. Cun chësta pruposta (da NCUEI) dl 13 de fauré uelen limité la liberazions ududes danora da pert dl Guviern Monti. I ponc zentrei ie scemplificazions a scumencé n’atività, liberalisazion dl cumerz ti zëntri di luesc y limitazions per l cumerz te raions de produzion.
Co che l pruvedimënc dl Guviern Monti dëssa unì cuncretisei tla situazion spezifica dl Südtirol ie stat argumënt de truepa sentedes y ancuntedes dl’ultima enes. La Jonta provinziela ie deberieda cun la lia di buteghieres HDS y la lia di chemuns ruveda a una de azeté trëi prinzipies.
La lizënzes de cumerz tumerà demez y unirà sustituides da comunicazions al chemun. L’aministrazions chemuneles puderà pona te tëmp de 60 dis se paré contra vel ativiteies cumerzieles fajan referimënt a cuestions prufesciuneles, saniteres, segurëza, desturb per la fuera y n.i..
L prinzip dla cuntinghënt vën a tumé. Nsci ne vel nia plu la grandëza mascima de butëighes.
Sciche terzo pont à l presidënt dla Provinzia riesc do la senteda nunzià l tumé de plans cumerziei per raion. Ti raions abitatives A y B uniral liberalisà la cubatura cumerziela. “Sce l vën n iede lascià vester l’atività cumerziela te na cësa, possela me plu unida scumenceda da nuef respeta la vedla regula de 40% dla strutura per l cumerz o servijes y 60% per cuatieres. Limitazions de 500 metri cuadrac per butëiga dëssa aldò de Durnwalder me plu resté per raions abitatives C.
Strutures cumerzieles ne dëssa per norma nia unì realisedes te raions categurisei sciche vërt agricul. Ezezion fej tlo l vënder de prudoc di luesc da paur o prudoc che ie liei a strutures che ie bele. L presidënt dla Provinzia à fat l ejëmpl dla stazion pra la streda dala rodes, la stazion dal penzin che possa vënder prudoc o l vënder prudoc pra la plaza dal Golf.
Ti raions de produzion puderan aldò dla pruposta de lege me vënder prudoc a detail che fej pert de cin categuries: auti, mascins da paur, materiai da frabiché, mubilia y buandes te majera cunfezions.
N cont de giaurì la butëighes de dumënia dëssel vester mesun fé ezezions aldò de bujëns liei ala situazions spezifiches ti luesc. Durnwalder à metù a cuer che duc i chemuns de l medemo livel de svilup turistich (livel bas, mesan o livel aut) muessa pité la medema pusciblteies. La Jonta provinziela se tën a tant che la ova bele fat ora dan n valguna enes dajan urientamënt y lascian lerch de dezijion ai chemuns.
La pruposta de lege data pro dala Jonta unirà purteda te Cunsëi provinziel per l’apruvazion. “Dopro sperons che l ne vënie nia fat recurs da pert de Roma, ajache on resià de jì bëndebò inant per defënder nosta strutures cumerzieles che ie unides fates su ti ani” à dit l presidënt dla Provinzia.
as
Galaria dales fotografies
Landeshauptmann Durnwalder zum Entwurf der neuen Handelsordnung
- Scarica il file audio 898 kb
