Atualità
Palestra da Lungiarü sön le program dles scores
USP - La comisciun provinziala por les frabiches scolastiches à tut sö la proposta dl comun da S. Martin da ingrandì la palestra da Lungiarü, che po ince gnì anuzada por manifestaziuns. Ajache la proietaziun ne n’é nia ciamò tla fasa esecutiva ne n’à la Comisciun nia ciamò podü tratè le finanziamënt da pert dla Provinzia.
A Lungiarü orésson ingrandì la palestra por podëi l’adorè plü saurì inće por manifestaziuns. Aladô dla proposta menada ite dal comun da San Martin gniss la spersa dui iadi tan grana, fajon n ampliamënt da 100 a 200 metri cuadrać. La palestra atuala é massa picera por l’ativité scolastica y inće por manifestaziuns dl post. Le proiet de mascima vëiga danfora la poscibilité de despartì la palestra ingrandida te döes perts a na manira da avëi la flessibilité da l’adorè tl medemo momënt por la scora y por manifestaziuns. Laprò àn inće ponsè a n palch da podëi alzè. Insciö pol gnì arjigné ca manifestaziuns zënza che i scolars ne romagnes nia zënza palestra.
Tla ćianoa, olache al é bele le local dl cor, gnìssel ćiamò dui locai por les lies, un de 32 metri cuadrać y un de 45 metri cuadrać.
Le costimënt odü danfora te chësta fasa dla proietaziun é de 1.207.000 euro. Le comun da S. Martin po śëgn jì inant cun la proietaziun y canche an arà le proiet esecutif, valutarà la comisciun por les frabiches scolastiches inće le finanziamënt da pert dla Provinzia.
as
