Atualità
Auguresc da Durnwalder y Mussner per titul mundiel de Carolina Kostner
USP – Cun l titul de campiunessa dl mond se à Carolina Kostner segurà na luegia tla storia dl sport. Auguresc per chësta gran arjonta vën nce dal presidënt dla Provinzia Luis Durnwalder y dal assessëur ladin Florian Mussner. „Co che la ie stata bona de arjonjer l prim plazamënt do che la fova terza tla prima pert de garejeda, mostra la gran capaziteies y maduranza de Carolina Kostner“ sotrissea i doi aministradëures.
„Carolina à dat ejëmpl che cun mpëni, lezitënza, na gran ulentà y la capaziteies aldò iel mesun arjonjer nce i majeri resultac“ sorissea l presidënt dla Provinzia che ie nce assessëur al sport. Chësta carateristiches dl’atleta de 25 ani de Urtijëi, ie debujën per arjonjer l majer suzes, dantaprima te na disciplina sportiva cun tan na gran cuncurënza. Aldò dl presidënt dla Provinzia se à Carolina Kosntner cun l titul mundiel nce segurà na luegia de unëur tla storia dl sport dl Südtirol, „Kostner ie veramënter una dl’atletes de majer suzes che l Südtirol ne à mei abù“.
L Presidënt à bele fat i auguresc scric per la bedaia d’or, sorissan che la jëuna de Gherdëina ie n atleta straurdinera, ma che la ie purempò daniëura n ejëmpl per atlec plu jëuni. „Son dla minonga che nosc talënc plu jëuni possa se cialé ju velch da Carolina Kostner, n cont de tan lonc che n possa ruvé sce n à la mentalità aldò“ dij Durnwalder. Ai auguresc dl presidënt se jonta nce chëi dl assessëur ladin Florian Mussner, che sorissea la legrëza y l stolz dla jënt de Gherdëina per l atleta che reprejentea la cumenanza ladina danter duc i nteressei y pasciunei dl jadiné.
usp
