Atualità
Azetà dui proiec dl raiun da jì cun i schi a Corvara
USP - La secunda Comisciun provinziala por la sconanza dla contrada, cun a ce l’arch. Adriano Oggiano, à aprovè tla sentada (da incö) ai 3 d’aurì dl 2012, i dui proiec che reverda les pistes dai schi a Corvara, cun n valgönes condiziuns.
La secunda Comisciun à aprovè le proiet che reverda la sostituziun di rôs dl implant da fà nëi dla pista dai schi "Col Alt" tl comun de Corvara, presentè dala sozieté che gestësc i implanć "Sciovie Ladinia S.p.A". I rôs gnarà baratà fora por 250 metri. La secunda Comisciun à dè dant che n iade che i laûrs é stlüć jö, mëssel indô gnì fat a na moda che le raiun atochè dai intervënć ćiares fora sciöche denant. L’autorité forestala ćiararà sura i laûrs.
Inće le proiet che reverda l’implant a cabines che va da Corvara al Lêch de Boà, olache al è preodü de baratè l’implant da śëgn cun n lift a aganciamënt automatich da 8 posć, y che é gnü dè jö dala sozieté che manajëia l'implant "Seilbahnen Boè S.p.A", é gnü aprovè dala Comisciun.
L’implant a cabines mëss gnì revijionè y te chësta ocajiun él preodü da baratè fora les cabines da śëgn cun de nöies. Implü vëiga danfora le proiet che al vëgnes tut demez n pilaster (dai 20 da śëgn pàsson spo a 19), aumentè la portada da 2400 a 3000 porsones/ora y amplié la staziun jödapé. La secunda Comisciun por la sconanza dla contrada à dè dant che do i laûrs, controlà dal’autorité forestala, messaràl gnì fat a na moda che le raiun atochè dai intervënć ćiares indô fora sciöche denant. Le medemo vel inće por les sëmenes. Implü messaràl gnì laurè fora y dè jö pro l’Ofize Sconanza dla contrada na proposta (stüde di corusc) por les cabines dl implant y le revestimënt dla staziun jödapé. Al é gnü metü sö na cauziun de 20.000 euro.
usp
