Atualità
L Museum Ladin nvieia a fé pea l proiet ECHI
USP - L Museum Ladin Ciastel de Tor nvieia la populazion de Gherdëina à fé pea ativamënter l proiet interreg “E.CH.I. – Etnografies talianes-svizres”, tres chël che l vën fat na tueda sun l’arpejon culturela nia materiela dla valeda. Chiche se da cunté de usanzes, tradizions, festes, bai, lijëndes y stories de Gherdëina, o che à vel pez, vel foto de documentazion ie priei bel de tò su cuntat cun l Museum Ladin.
Documenté l patrimone culturel nia materiel y l prejenté al publich ie l fin prinzipel dl proiet interreg te na culaburazion sëura la sëida dla Talia y Svizra. Pra l proiet E.CH.I (Etnografie italo-svizzere) fej pea i ciantons svizri Vallais/Wallis, Tessin, Grijons, la regions Lombardia, Val d’Aosta, Piemonte y la Provinzia de Bulsan cun l Museum Ladin Ćiastel de Tor.
L Museum Ladin à cris ora de dediché la nrescida a Gherdëina, nciarian l etnologh y atropologh ladin Emanuel Valentin de fé n inventar dl patrimone culturel nia materiel. Chiche à material che conta usanzes y tradizion de Gherdëina che manacia de jì perdudes, ie prià bel de judé pea. L savëi de utl per chësta nrescides possa unì dat inant al Museum Ladin cherdan su l numer 0474 524062 o scrijan na e.mail a info@museumladin.it. L nvit ti va nce a chiche ëssa da mustré vel pez da zacan, de natura religëusa o profana, massaria storica, fotografies o nce vel video che mostra su la vita, la tradizions o l artejanat da plu da giut.
L etnologh Emanuel Valentin che se cruzia dl proiet, ie a desposizion per n’ancunteda y per scuté su cie che jënt sa da ti cunté. L Museum Ladin regrazia bele danora chi che uel judé pea a chësc proiet per documenté y dé inant la cultura de Gherdëina nia materiela.
as
