Atualità
Jonta provinziela da pro mudazions urbanistiches per l turism
USP - La Jonta provinziela à (NCUEI) ai 16 de auril dat pro de mudé la cundizions urbanistiches per i raions de turism sun trëi ponc: la cubatures, la cumpëida minima de liec y l giaurì di servijes de cura a tlienc che ne ie nia te cësa.
Sun trëi ponc à i assessëures provinziei ulù ti lascé na majera lidëza ai raions per ativiteies turistiches. La dezijion de mëter n drova chësta diretives ti spieta ai singuli chemuns.
La densità urbanistica dëssa unì auzeda da 1,9 a 2,5 cubich per meter cuadrat. “Chësc ulons arjonjer acioche l vënie adurvà manco grunt” à dit l presidënt Drunwalder do la senteda dla Jonta.
L segondo pont reverda la grandëza minima de 60 liec. Tlo à la Jonta dat pro de tò demez la limitazion y de pité la cundizions urbanistiches nce a de mëndra ativiteies canche l ie debujën.
I servijes de cura (wellness) dëssa nce pudëi unì giaurì a tlienc che ne ie nia te cësa. L personal muessa te n tel cajo avëi la medema furmazion sciche l ie damandà per ativiteies de chësta sort ora di hotiei. “Sce l’ativiteies à bele chisc servijes, dëssi nce pudëi unì nuzei da jënt ora de cësa. Chësc suzed bele suvënz y nsci ons nce ulù l regulamenté” à dit l presidënt dla Provinzia.
as
