Atualità
Trash Art dla scola mesana de Sëlva a Bulsan
USP – Per fé pensé do la jënt sun l refudam che di per di devënta for de plu à la scola mesana “Arcangiul Lardschneider” de Sëlva nvià via la scumenciadiva “Trash Art”. Sculeies à tëut ca pec de refudam y fat dainora creazions artistiches. La mostra de chisc pec ie sën, sun nvit dl assessëur Mussner, da udëi tla cësa provinziela doi a Bulsan.
Tl ann de scola passà se à duc i sculeies dla scola mesana de Sëlva dat ju cun l trasfurmé de refudam te esprescions artistiches. Ntan l’ëures de educazion artistica, de educazion tecnica y nce d’autra materies se à la sculees y i sculeies tëut a cuer l recycling. Ëi à tëut ca d’uni sort de refudam sciche per ejëmpl pec de computer, tòc de radio, butons, lumes, ciauzei, struplons, bozes de plastica, roles y nsci inant y à svilupà opres d’ert plëines de fantajia y criatività.
La scumenciadiva de sensibilisazion sun la problematica dl refudam ti à bele pra la mostra te Sëlva tan plajù al assessëur Florian Mussner che l à nvià la scola a mustré su chisc lëures nce tla sënta de si assessorat a Bulsan. “Per la proscima trëi enes dëssa i lëures di sculeies de Sëlva judé pro a fé pensé do la jënt che passa tlo” à dit Mussner. “Nëus duc messon mëter plu a verda cie che tulon tla mans, cie che adurvon veramënter y nstësc adurvé cosses che cumporta manco refudam”. Pert dla mostra ie nce placac nfurmatives che spiega i cuntenuc laurei su te scola.
as
