Atualità
L’energia sarà l zënter dla culaburazion Euregio
USP – L’energia, dantaprima l sparanië y l nuzé cun efiziënza, ie l argumënt dl daunì dla region europea Südtirol – Trentin – Tirol. Chësc ie unì ora dala senteda dla Jonta dla grupa europea de culaburazion teritoriela (GECT/EVTZ) cun Luis Durnwalder, Lorenzo Dellai y Günther Platter. I trëi presidënc de provinzia à (NCUEI) ai 03 de mei sotscrì n protocol de vester a una de svilupé deberieda strategies de sustenibltà tl frabiché.
Mez ann do la fundazion dla grupa europea de culaburazion teritoriela "Euregio Tirol-Südtirol-Trentino", lëura la trëi provinzies dla region europea bele a feter 30 proiec deberieda. L presidënt dla grupa europea Luis Durnwalder à nunzià n valgun proiec simbolics: “17 scumenciadives vën purtedes inant dala grupa nstëssa, te 16 vëniel laurà da cuordinadëur. Lauron deberieda per svilupé n frabiché sustenibl, la realisazion dl Green Corridor, na culaburazion sëura la sëides per la furmazion tla sanità, strategies per l transit y n liber de storia deberieda per la trëi provinzies. Pra la Forum Alpbach iel chësta ann per l prim iede unì tenì n di dla region europea, mpede n di dedicà me al Tirol”.
Duta chësta scumenciadives à da śën nce n logo deberieda. L’éguia tlameda „Aquila Tirolensis“ ie metuda adum da trëi pertes che simbulisea la trëi provinzies.
L de prò dl logo ie deberieda cun l rendicont y l urientamënt per l daunì, stat al orden dl di dla prima reunion generela do la fundazion de utober tl Ciastel Tirol. Na majera mpurtanza permez al logo à la sotscrizion dl protocol de vester a una cun l frabiché sustenibl dal titul “Grenn Technologies”. “Tla trëi provinzies ons feter la medema cundizions a frabiché y on bele fat gran speriënza. Chëstes ulon mëter adum y svilupé inant” à dit Durnwalder.
Aldò dl protocol sotscrit dëssa la region europea deventé una de chëles cun l majer mpëni per la sustenibltà. L ie udù dant na banca dac cun duta la firmes che lëura tl ciamp dl frabiché sustenibl y n monitoring de proiec de nteres publich tl ciamp dl frabiché sustenibl y de tecnologies ambienteles. L protocol vëija nce dant de scrì ora deberieda proiec de tueda ndustriela, frabiché sustenibl, tecnologies ambienteles. Deberieda dëssel nce unì fat documënc per fé pea fieres y manifestazions dedichedes al frabiché sustenibl y energia alternativa.
as
Galaria dales fotografies
foto USP/Pertl.
