Atualità
Jonta uel sparanië tulan demez lëures paralei
USP – La Jonta provinziela uel sustenì l Guviern talian a abiné custimënc che l Stat pudëssa se sparanië tl Südtirol. La Jonta provinziela à (NCUEI) ai 07 de mei dat pro che analisan i custimënc, dëssel nce unì cialà ulache la Provinzia possa lascé demez lëures paralei.
Ufizialmënter à Enrico Bondi giapà la ncëria dal Guviern talian de cuntrolé ulà che l Stat pudëssa spënder de manco. Ciuni che ie i ciamps tl Südtirol ulache l Stat pudëssa sparanië, muessa permò unì analisà. “Lëures paralei che n pudëssa lascé demez ie l dutor dai tieres de cunfin, l archif de Stat y cuntroi de sanità y ambient (NAS, NOE) “ à dit l presidënt Luis Durnwalder do la senteda dla Jonta provinziela.
I ufizies provinziei giata la ncëria de lauré ora prupostes tres chëles che n pudëssa sparanië lëures paralei danter Stat y Provinzia. L presidënt dla Provinzia à sorissà che l uel vester l snait de sparanië nce nstësc. Nsci uelen mëter adum i ufizies provinziei per l’ega y l ambient. Proscimamënter dëssa nce l Istitut de statistica provinziel unì ntegrà tla direzion generela dla Provinzia.
as
