Atualità
"72:92:12" ie la plata web di 40 ani dl’Autonomia nueva
USP – 500 fotos di 40 ani, vel pec de video storics, duta la nfurmazions y na cronologia a puntin: dut chësc pieta la nueva plata web www.provinzia.bz.it/729212 che ie sën online. Chësta prejentazion sun internet ie unida fat n ucajion di doi anuei da chëst ann: i 40 ani dl Segondo Statut de Autonomia y i 20 ani de avëi finà l stritoz danter Austria y Talia per l Südtirol. Perchël l moto "72:92:12".
Nia cunté di 40 ani dl svilup dl’Autonomia cun na gran storia, ma cun truep’ de pitl stories: chësc se à l Servisc de Comunicazion dla Jonta provinziela tëut dant lauran ora la plata web sun l’Autonomia (www.provinzia.bz.it/729212) cun l sustëni dla sozietà Südtirol Informatik AG, la repartizion Nfurmatica y l Ufize per media audiovisuei. “La ne se à nia tan tratà de fé al savëi truepa nfurmazions singules, ma plu che auter de fé n cheder dl svilup che l Südtirol à fat per merit de si Autonomia ntan i ultimi 40 ani” spiega l presidënt dla Provinzia Luis Durnwalder.
De chësc viers à tla plata web dat pëis ala pert visuela. Na selezion de 500 fotografies di 40 ani mostra su co che Südtirol se à mudà do l jì n droa dl Segondo Statut de Autonomia. La fotografies mostra nce la mudazion persunela, davia che vel un sarà nce da cunëscer sun la fotografies storiches. Al cheder visuel dl’svilup se jonta nce de pec curc de video fai da privac o tl cheder dl proiet “Bewegtes Leben”. Ntan la proscima enes unirà i pec curc de video do y do ciariei sun la plata per dé na mprescion de co che Südtirol se à svilupà y co che chësc svilup ie unì udù ai videoamatëures.
Sëuraprò a duta la mprescion visueles iel sun la plata web nce da abiné nfurmazion. Na cronologia prejënta drët a puntin la tapes storiches y la ntraunides cun la puscibltà de liejer do plu avisa y ti jì plu sot.
La plata web ne ie nia comunicazion te na sëula direzion, uni un possa mandé ite fotos che mostra si pont de ududa dl’Autonomia, deventan nsci nstës pert de chësta Autonomia.
as
