Atualità
Convenziun dles Alpes: Mussner sotescrî acordanza a Roma
USP – Cun la sotescriziun dl assessur Mussner à la Provinzia de Balsan azetè l’acordanza danter le Ministêr por l’ambiënt y les regiuns por mëte a jì le program dla Convenziun dles Alpes sot la presidënza dla Talia. L’acordanza é gnüda sotescrita (INIER) ai 15 de novëmber a Roma.
Dl 2013 y 2014 à la Talia la presidënza dla Convenziun dles Alpes. Do che le Parlamënt à ratifiché do agn de discusciuns dan da n valgönes edemes l'ultim protocol che manćiâ ćiamò dla Convenziun dles Alpes, chël sön le trasport, ô la Talia, chël ô dì le Ministêr por l'ambiënt talian laurè fora ti 2 agn che vëgn n valgönes scomenciadies determinantes.
Le minister por l'ambiënt Corrado Clini à invié a Roma i rapresentanć dles regiuns, dles provinzies y dles istituziuns - pro chëstes êl inće l'Eurac y la Fondaziun Dolomites UNESCO - por baié di punć zentrai dla presidënza taliana dla Convenziun dles Alpes y sotescrì n'acordanza, che vëiga danfora la colaboraziun a düć i livì.
La Talia ô analisé ti dui agn de süa presidënza le mudamënt demografich, le mudamënt dl tlima, le turism, la mobilité y la biodiversité tles regiuns dles Alpes y laurè fora strategies por le dagnì. L'assessur provinzial Mussner sotrissëia che por n svilup sostenibl él dantadöt la gran cerna de argomënć importanta: "Le program de laûr é ampl y ne tëgn nia ma cunt dl ambiënt, mo liëia tröc ćiamps dla sozieté dal trasport al'energia ćina al mudamënt dla strotöra dla popolaziun".
Al vëgn preodü programs d'aziun che reverda l'efiziënza dl'energia, l'energia renovabla y l'adoranza sostenibla dla forza dl'ega, la realisaziun de n'ajënda dles Alpes digitala y le svilup de na strategia por na macroregiun dles Alpes. "La colaboraziun sura i confins fora n'é nia val' danü por nos. I la realisun bele tla Europaregiun. Na cossa positiva é che inće ti planns por la presidënza dla Convenziun dles Alpes é śëgn l'argomënt macroregiun dles Alpes dër important". Le protocol che inće l'assessur Mussner à sotescrit vëiga danterater danfora n grup de laûr, che dess fà rové ite i punć zentrai te n program d'ativité.
usp
